1 Ne eggingume e ka aldew te peggukum te Magbebaye ne Manama. Te seeye kangkuwa ne timpu, egpangahawan kew te me kuntere niyu te me kasangkapan niyu, wey egba-baaren dan diye te tangkaan niyu, me matig-Hirusalim. 2 Ne eglibulungen te Magbebaye ka langun ne keet-etawan te me nasud eyew egpakigkuntere te Hirusalim. Ne egkaahew ran ka siyudad wey egpanakawan dan ka me baley, wey egpamehesen dan te eggilabet ka me malitan. Ne egkabaad ka me mahinged; egkarakep ka senge-baad wey eg-uyanen diye te mariyu, wey egkahaat ded ka senge-baad diye te siyudad. 3 Ne egpakig-ehet ka Magbebaye te seeye ne me nasud, iling te pegpakig-ehet din dengan. 4 Te seeye kangkuwa ne aldew, egsasindeg sikandin diye te Bubungan te me Ulibu ne diye dapit te egkatangkaan te Hirusalim dapit te igsile. Egkaperi ka bubungan puun te igsile peendiye te iglineb wey egmapatag e ka elat iling te luluahi ne napu. Ne egpekegtalipag e ka nabaad ne bubungan; ka senge-baad egpekeendiye te igkahibang ne balabahan, wey ka baad egpekeendiye te igkakawanan ne balabahan. 5 Ne egpamallahuy kew ka egpariyu te bubungan te Magbebaye ne Manama, wey diye kew egbaye te bangalug ne egleus diye te Askal. Eggulunsuwey kew ka egpamallahuy iling dengan te due linug te si Usiyas pad ka mighari te Huda. Egkataman, eggingume e ka Magbebaye ne Manama ku ne egdumaan te me panalihan* Te Hibruwanen: me matulus. din. 6 Te sika kangkuwa ne aldew, warad e meinit wey ke maagsil, wey ke salahapun naa.† Te Hibruwanen: egmakepal ka katelesan. 7 Ne kein-inuwan seini ne timpu; warad e marusilem, su warad ma tamanan te aldew ne eglayag. Ka Magbebaye ne Manama re ka nakataha ke ken‑u seini egkeyitabu.

8  ✡ Isi 47:1; Huw 7:38; Imp 22:1.Ke eggingume e ka sika ne timpu, due eglepew ne weyig due te Hirusalim ne egpakabehey te umul. Egkabaad ka weyig; egtulayas peendiye te Namatey ne Dahat‡ Te Hibruwanen: dahat dapit te igsile. ka senge-baad, wey ka senge-baad egpekeendiye te Dahat te Miditiranyu.§ Te Hibruwanen: dahat dapit te iglineb. Ne warad egtamanan te pegtulayas te seeye ne weyig minsan timpu te meinit wey ke lengleng naa. 9 Ne ka Magbebaye ne Manama ka egkeyimu ne Hari te intiru ne kalibutan. Te sika kangkuwa ne aldew, sikandin naan de ka Magbebaye, wey sikandin* Te Hibruwanen: sabeka re ka ngaran din. naan de ka egsimbeen.

10 Ne egmapatag e ka intiru ne inged puun te Giba† Ka Giba diye dapit te igkahibang te Hirusalim dapit te igsile. peendiye te Rimun ne diye dapit te igkakawanan te Hirusalim dapit igsile. Piru kene mule egkaweil ka Hirusalim ne nakatawan-tawan diye te matikang ne bubungan ne nasasindehan te siyudad, puun te Gumawan ni Binhamin peendiye te Tapey ne Gumawan, peendiye te Pikungan ne Gumawan, wey puun te Matikang ne Baley ni Hananil, peendiye te kelesanan te behas te paras te Hari. 11  ✡ Imp 22:3.Ne masulug e ka me etew ne eg-ugpe te Hirusalim su kenad e egguhusen ka sika ne siyudad, wey warad igkabantali ran ne karereetan.

12 Ne seini ne dalu ka igpasalerep te Magbebaye ne Manama te langun ne keet-etawan ne egkuntere te Hirusalim: egkengammewu ka me sapu dan, ka me mata ran, wey ka me dile dan, minsan mallenggew pad sikandan.

13 Ne te sika ne timpu eglibehen sikandan te Magbebaye ne Manama, wey egmeun-unayey e sikandan egmahumgumgumiey. 14 Ne minsan ka Huda, egpakig-ehet degma diye te Hirusalim eyew egpangabangan seini. Ne eglibulungen diye te Hirusalim ka me karatuan te langun ne nasud: ka me bulawan, pelata, wey ka masulug ne me kumbale.

15 Ne egpakasalerep degma te iling ded ne dalu ka me kudde, me mula,‡ Sabeka seini ne ayam ne anak te lukes ne asnu wey beyan ne kudde. me kamil, me asnu, wey minsan nekey ne ayam ne diye te kampu te me kuntere dan.

16  ✡ Lib 23:39-43.Ne ka langun ne nenasame ne me etew te me nasud ne miglusud te Hirusalim, eggendiye te Hirusalim te tagse leg‑un eyew egsimba te Hari ne iyan ka Amana ne Maresen ne Magbebaye, wey eyew egtambung te Sahakeen diye te me Leeb. 17 Ka keet-etawan ne kene eggendiye te Hirusalim eyew egsimba te Hari ne iyan ka Amana ne Maresen ne agbebaye, kene sikandan egpeuranan. 18 Ka me matig-Ihiptu ne kene eggendiye te Hirusalim, egpakasalerep degma sikandan te legpad te Magbebaye ne Manama iling te duma ne me nasud ne kene egtambung te Sahakeen diye te me Leeb. 19 Ne ka iglegpad te Ihiptu, sikan ded ka iglegpad te langun ne nasud ne kene egtambung te Sahakeen diye te me Leeb.

20 Te seeye kangkuwa ne aldew, igsulat diye te me saliyew te me kudde ka seini ne lalag: “Inhalad seini ne me kudde diye te Magbebaye ne Manama.” Ne minsan ka me kuren ne diye te timplu, egmatulus degma iling te me yahung ne diye te tangkaan te altar. 21 Ka langun ne kuren diye te Hirusalim wey Huda, egmatulus e diye te Amana ne Maresen ne Magbebaye. Ne ka me talagpanubad, sikan e ne me kuren ka egsubaan dan te ighalad dan. Te sika ne timpu, warad e me nigusyanti§ Te Hibruwanen: matig-Kanaan. diye te timplu te Amana ne Maresen ne Magbebaye.