16
Intahu ka Tahuanan te Kasabutan
1 Ne in-uyan dan ka Tahuanan te Kasabutan te Manama wey intahu dan seini diye te balungbalung ne inggimu ni Dabid para kayi. Ne migpanubad sikandan diye te Manama te egtutungen ne igpanubad, wey te igpanubad para te keupianan. 2 Te nekeimpus e si Dabid ka migpanubad te egtutungen, wey te igpanubad para te keupianan, impanalanginan din e ka me etew pinaahi te ngaran te Magbebaye ne Manama. 3 Ne impamehayan din sikandan langun te tigsalimbeka ne paan, ngalap, wey me behas te paras ne indampil.
4 Ne mig-alam si Dabid te me Libita ne iyan egpamakey diye te tangkaan te Tahuanan te Kasabutan te Manama, eyew egpangananey, egpasalamat, wey egdayan te Magbebaye ne Manama te Israil. 5 Ne si Asap ka pangulu, wey iyan din talagbulig si Sakariyas. Ne si Hiil, si Simiramut, si Hihiil, si Matatiyas, si Iliyab, si Binayas, si Ubid-Idum, wey si Hiil, iyan me talagparahing te me lira wey me alpa. Si Asap ka talagparahing te putew ne basalan. 6 Ne ka me talagpanubad ne si Binayas wey si Diyahasil iyan egparahing te me trumpita tagse aldew diye te tangkaan te Tahuanan te Kasabutan te Manama.
Ka pegsaye ne ulahingen
(Salmu 105:1-15; 96:1-3; 106:1,47-48)
7 Te seeye ne aldew, imbehey ni Dabid ki Asap wey te me duma rin ne me Libita seini se ulahingen te pegpasalamat te Magbebaye ne Manama:
8 Pasalamati niyu ka Magbebaye ne Manama;
dawita niyu ka ngaran din!
Ipanengneng niyu
ka neneyimu rin diye te langun ne keet-etawan.
9 Ulahingi niyu sikandin!
Deyraya niyu sikandin!
Ipanengneng niyu ka me kein-inuwan ne me himu rin.
10 Ipeggasal niyu ka matulus ne ngaran din;
egkahale ka pusung te seeye se egparani te Magbebaye ne Manama.
11 Salig kew te Magbebaye ne Manama
wey te keseg din.
Layun kew parani kandin.
12 Sumsumana niyu ka me mateles ne inggimu rin;
ka me kein-inuwan,
wey ka me peggukum ne inlalag din.
13 He me anak ni Israil ne suluhuanen te Manama;
He kabuhalan ni Hakub ne in-alam te Manama.
14 Sikandin ka Magbebaye ne Manama ta;
eggukuman din ka intiru ne kalibutan.
15 Kene sikandin egkalingew te kasabutan din
te ware egtamanan
wey te saad din minsan te linibu pad ne kabuhalan.
16 ✡ Hin 12:7; Hin 26:3.Ka sika ne kasabutan, inggimu rin duma ki Abraham
wey impahunlibetan din man‑e diye ki Isaak.
17 ✡ Hin 28:13.Impamalehetan din seini diye ki Hakub isip balaud,
wey isip kasabutan ne ware egtamanan diye te me matig-Israil.
18 Ingkahiyan din sikandan, “Igbehey ku kaniyu ka tane te Kanaan
isip karatuan ne inggaat ne egkaangken niyu.”
19 Te pila-pila pad ka keet-etawan te Manama,
wey te kene pad amana sikandan ne masulug,
wey te kene pad sikandan ne mahinged te Kanaan,
20 nalaag-laag sikandan diye te nalein-lein ne me nasud wey te migharian.
21 ✡ Hin 20:3-7.Ware din tuhuti ne egde-deehen sikandan te minsan hentew.
Insaparan din ka me Hari te migkahi,
22 “Kene niyu hilabeti ka in-alam ku,
wey kene niyu pasakiti ka me prupita ku!”
23 He intiru ne kalibutan, ulahingi niyu ka Magbebaye ne Manama.
Ipangguhud niyu te langun ne aldew ka pegluwas din kaniyu.
24 Ipanengneng niyu diye te me nasud ka katelesan din,
wey ka me kein-inuwan ne himu rin diye te langun ne me etew!
25 Su mabantug ka Magbebaye ne Manama
wey likes ne egdeyrayen.
Egkaaldekan sikandin te langun ne me manama.
26 Su me diyus-diyus de ka langun ne manama te me nasud
piru ka Magbebaye ne Manama mule ka miggimu te me langit.
27 Diye te kandin ka kabantug wey ka karesen;
diye te ugpaan din ka kanekal wey ka kahale.
28 Deyraya niyu ka Magbebaye ne Manama,
he keet-etawan te me nasud.
Deyraya niyu ka katelesan din
wey ka karesen din.
29 Ibehey niyu diye te Magbebaye ne Manama
ka kabantug ne eleg te ngaran din.
Uyan kew te halad
wey parani kew diye te tangkaan din,
wey simbaa niyu ka Magbebaye ne Manama te pegkamatulus din.
30 Kaaldeki niyu sikandin, he intiru ne kalibutan!
Immalig‑en din te eggimu ka kalibutan, wey kene seini egkaweil.
31 Gale-gale kew se me langit,
wey kalibutan!
Kahii niyu ka me nasud,
“Mighari e ka Magbebaye ne Manama!”
32 Deyrey kew se karagdahatan,
wey sikaniyu se langun ne nakatahu kayi!
Gale-gale kew se me kamet,
wey sikaniyu se langun ne nakatahu kayi!
33 Ne ka me kayu diye te puwalas
egpanguleyi te kahale diye te tangkaan te Magbebaye ne Manama,
su eggendini sikandin eyew eggukum te kalibutan!
34 ✡ 2Kru 5:13; 7:3; Isra 3:11; Sal 100:5; 106:1; 107:1; 118:1; 136:1; Hir 33:11.Pasalamati niyu ka Magbebaye ne Manama,
su meupiya sikandin;
kene egkabalbalawan ka geyinawa rin.
35 Kahii niyu sikandin,
“Pangabangi key, he Manama ne manluluwas ney;
libulunga key wey luwasa key puun te me nasud
eyew egpakapasalamat key
wey egpakareyrey te matulus ne ngaran nu.
36 Egdayanen ka Magbebaye ne Manama;
ka Manama te Israil, te ware egtamanan!”
Ne migkahi ka langun ne keet-etawan, “Malehet iya!”
wey indayan dan ka Magbebaye ne Manama.
Ka pegsimba diye te Hirusalim
37 Ne impiyal ni Dabid ki Asap wey te me duma rin ne me Libita ka peggimu te eggimuwen ne ingkeilangan te tagse aldew diye te tangkaan te Tahuanan te Kasabutan te Magbebaye. 38 Nalagkes te seini ne punduk si Ubid-Idum wey ka hen‑em ne pulu wey walu (68) ne karumaan din. Ne si Ubid-Idum ne anak ni Hidutun, wey si Husa ka me talagtameng te gumawan.
39 Ne si Saduk ne talagpanubad wey ka me duma rin ne me talagpanubad, iyan impiyalan te me himu diye te tangkaan te Matulus ne Balungbalung te Magbebaye ne Manama, diye te bubungan te Gibyun. 40 Sikandan layun ka egpanubad te igmanubad ne egtutungen diye te altar, maaldew wey marusilem, sumale te langun ne nasulat te Balaud te Magbebaye ne Manama ne imbehey rin te me matig-Israil. 41 Iyan dan duma si Himan, wey si Hidutun, wey ka duma pad ne naalam te pegpasalamat te Magbebaye ne Manama tenged te geyinawa rin ne kene egkabalbalawan. 42 Ne katungdanan degma ni Himan wey ni Hidutun ka egparahing te me trumpita wey te putew ne basalanan wey ka egparahing te duma ne me instrumintu para te peg-ulahing te pegdayan. Ne iyan impatameng te gumawan ka me anak ni Hidutun.
43 ✡ 2Sam 6:19-20.Ne nataman, nanguli e ka langun ne keet-etawan diye te me baley ran, wey mig-uli e degma si Dabid diye te baley rin eyew egpanalangin te pamilya rin.