3
Ka peggimu te iyam ne altar
1 Te igkapitu e ne bulan,* Neyitabu seini te tatelu e ne bulan ka miglihad te peg-uli dan puun te Babilunya. te nenekeugpe e ka me Israilita diye te me lungsud dan, miglibulung sikandan diye te Hirusalim. 2 ✡ Iks 27:1.Ne si Hiswi ne anak ni Husadak wey ka me duma rin ne me talagpanubad, wey si Sirubabil ne anak ni Salatiil, wey ka me karumaan din, migbunsud e ka egbalew-balew te altar te Manama te Israil eyew egtutungan te igmanubad dan sumale te nasulat te Balaud ni Muwisis ne suluhuanen te Manama. 3 ✡ Num 28:1-8.Ne impasasindeg dan ka altar diye te natahuan dengan kayi minsan nenaaldek sikandan te mahinged diye. Ne migtutung e sikandan te igmanubad diye te Magbebaye ne Manama tagse maselem wey te marusilem.† Te Hibruwanen: “marusilem ne pegpanubad” piru egkeyitabu seini te me alas tris peendiye te alas singku te maapun. 4 ✡ Num 29:12-38.Ne intuman dan ka Sahakeen diye te me Leeb sumale ke nekey ka nasulat, wey migtutung sikandan te igmanubad sumale te ingkeilangan ne igpanubad te tagse aldew te seini ne Sahakeen. 5 ✡ Num 28:11–29:39.Pegkeimpus dutu, impabulus dan ka pegtutung te igmanubad te tagse maselem wey marusilem, wey ka peghalad te timpu te Iyam ne Bulan,‡ Te pegbunsud te iyam ne bulan, egtutung te igmanubad ka me Israilita eyew egpasalamat te Magbebaye ne Manama. wey ka langun ne sahakeen ne suhu te Magbebaye ne Manama. Ne migbehey degma ka me etew te me dasag ne igpanubad diye te Magbebaye ne Manama. 6 Te an-anayan ne aldew te igkapitu ne bulan, migbunsud e sikandan ka migmanubad diye te Magbebaye ne Manama minsan ware pad nabunsuri ka pabunsuran te timplu te Magbebaye ne Manama.
Ka pegbalew-balew te timplu
7 Sikan naa, imbayaran dan te pelata ne seleppi ka me talagperi te batu wey ka me talagbebaley. Imbehayan dan degma ka me matig-Sidun wey ka me matig-Tiru te egkakeen, egkeinum, wey te mentika, eyew eg-uyan sikandan te kayu ne sidar ne egpuun te Libanun. Ne diye dan seeye ipabaye te dahat te Hupa sumale te pegtuhut ni Siru ne Hari te Pirsya.
8 Migbunsud sikandan te pegbalew-balew pegpasasindeg te timplu te igkarangeb ne bulan te igkarangeb ne leg‑un te pegginguma ran diye te Hirusalim. Ne migbulig si Sirubabil ne anak ni Salatiil wey si Hiswi ne anak ni Husadak, duma te langun ne duma ran ne me talagpanubad, me Libita, wey te langun ne nekeuli diye te Hirusalim puun te pegkarakep. Ne mig-alam sikandan te me Libita ne puun te daruwa ne pulu (20) se idad wey subla pad, eyew iyan egmandu te egtrabahu te timplu te Magbebaye ne Manama. 9 Ne naalam ensi Hiswi duma te anak din ne me lukes wey te karumaan din, wey ensi Kadmiil duma te anak din ne me lukes, ne me kabuhalan langun ni Hudabiyas.§ Si Hudabiyas, egngaranan ded degma ki Huda. Sikandan ka migmandu te egtrabahu te timplu te Manama, wey migbulig degma kandan ka me kabuhalan wey me karumaan ni Hinadad ne me Libita degma.
10 ✡ 1Kru 25:1.Te imbunsuran e te me talagbebaley ka pabunsuranan te timplu te Magbebaye ne Manama, migparani e ka me talagpanubad ne migsaluub te malayat ne me kumbale dan ne migpanguyan te me trumpita. Ne migparani degma ka me Libita ne kabuhalan ni Asap ne migpanguyan te putew ne basalan eyew te pegdeyrey te Magbebaye ne Manama, sumale te insuhu ni Dabid ne Hari te Israil dengan. 11 ✡ 1Kru 16:34; 2Kru 5:13; 7:3; Sal 100:5; 106:1; 107:1; 118:1; 136:1; Hir 33:11.Ne migpasubsubaley sikandan ka eg-ulahing te pegdeyrey wey pegpasalamat te Magbebaye ne Manama ne miggenendue,
“Meupiya ka Magbebaye ne Manama
su ka geyinawa rin te Israil kene egkabalbalawan.”
Ne migmanguleyi te meemen ka langun ne etew te pegdeyrey te Magbebaye ne Manama, tenged su nabunsuran e ka pabunsuranan te timplu te Magbebaye ne Manama. 12 Piru masulug ka me buyag e ne talagpanubad, me Libita, wey me pangulu te me pamilya ne nakakita te an-anayan ne timplu. Migsinehew* Migsinehew ka me buyag tenged su ka iyam ne timplu kenad ne iling karakel wey kateles te tapey ne timplu. sikandan te meemen te pegkakita ran te nakatahu e ka pabunsuranan te iyam ne timplu, piru masulug degma ka migmanguleyi te pegkahale. 13 Ne kenad egkeilaan ka laheng te pegkuleyi te kahale wey ka laheng te pegsinehew, tenged su amana ne mahulub ka me etew wey egkarineg ka me laheng dan diye te mariyu.
*3:1 Neyitabu seini te tatelu e ne bulan ka miglihad te peg-uli dan puun te Babilunya.
†3:3 Te Hibruwanen: “marusilem ne pegpanubad” piru egkeyitabu seini te me alas tris peendiye te alas singku te maapun.
‡3:5 Te pegbunsud te iyam ne bulan, egtutung te igmanubad ka me Israilita eyew egpasalamat te Magbebaye ne Manama.
§3:9 Si Hudabiyas, egngaranan ded degma ki Huda.
✡3:11 1Kru 16:34; 2Kru 5:13; 7:3; Sal 100:5; 106:1; 107:1; 118:1; 136:1; Hir 33:11.
*3:12 Migsinehew ka me buyag tenged su ka iyam ne timplu kenad ne iling karakel wey kateles te tapey ne timplu.