1 Ne ingkahiyan ni Muwisis ka me kabuhalan ni Israil, “Te katammanan te tagse igkapitu ne leg‑un, keilangan ne eglingawan niyud e ka langun ne utang te seeye se migpangutang kaniyu te seleppi. 2 Ne seini ka eggimuwen niyu: kene niyud peulii ka insambayan te duma niyu ne me kabuhalan ni Israil su migginguma man e ka timpu ne inteil te Magbebaye ne Manama ne kenad e egsukuten ka me utang. 3 Piru egkaayun mule ne egpeulien niyu ka me lapu te nasambayan dan ne seleppi, piru kene niyud mule sukuti ka me duma niyu ne me kabuhalan ni Israil.

4 “Ware egkaayu-ayu kaniyu su egpanalanginan kew ma te Magbebaye ne Manama niyu, diye te tane ne igbehey rin kaniyu, 5 ke egtumanen niyu te mapahetpet ka langun ne suhu din ne ingkahi ku kaniyu kuntee ne aldew. 6 Egpanalanginan kew iya te Magbebaye ne Manama niyu sumale te insaad din kaniyu; egpasambey kew te seleppi diye te duma ne nasud, piru kene kew mule egpanambey kandan. Egmanduan niyu ka masulug ne nasud, piru ware sabeka ne egpakamandu kaniyu.

7  ✡ Lib 25:35.“Ne emun ke due duma niyu ne me kabuhalan ni Israil ne egkaayu-ayu diye te sabeka te me lungsud diye te tane ne igbehey kaniyu te Magbebaye ne Manama niyu, kene kew ubag balibad ne egbulig kandan. 8 Ke kene, pamehayi niyu sikandan wey pasambaya niyu te egkeilanganen dan. 9 Ne kene kew suman-suman ne kene kew e egpasambey te duma niyu ne me kabuhalan ni Israil ne egkengaayu-ayu ke mahaan e ka igkapitu ne leg‑un, ka leg‑un ne kenad e egsukuten ka me utang, su emun ke egpangananey te Magbebaye ne Manama ka egkaayu-ayu tenged kaniyu, eg-isipen kew ne nakasale. 10 Behayi niyu sikandan ne egpuun te pusung niyu, wey kene kew sagsahukul, eyew egpanalanginan te Magbebaye ne Manama niyu ka langun ne eggimuwen niyu. 11  ✡ Mat 26:11; Mar 14:7; Huw 12:8.Due layun egkaayu-ayu wey egkengaware-ware diye te nasud niyu, purisu, migsuhu a kaniyu ne egbulihan niyu sikandan.”

12  ✡ Lib 25:39-46.Ne ingkahiyan e man‑e ni Muwisis ka me kabuhalan ni Israil, “Emun ke due duma niyu ne me kabuhalan ni Israil ne imbelegye kaniyu isip uripen, lukes ma wey se malitan, hen‑em de ne leg‑un sikandin ka egkeuripen niyu, wey te igkapitu ne leg‑un, behayi niyud e sikandin te kaligwangan. 13 Ne kene niyu sikandin peyipanawa ne ware egkeuyan; 14 pamehayi niyu sikandin te me karniru, trigu, wey binu, iling te pegpanalangin kaniyu te Magbebaye ne Manama niyu. 15 Sumsumana niyu ne me uripen kew degma dengan diye te Ihiptu, piru impalihawang kew te Magbebaye ne Manama. Purisu inlalahan ku sikaniyu kuntee te seini ne suhu.

16 “Piru ke kenad sikandin egkeupian ne eg-awe su inggeyinawaan kew e nikandin wey ka pamilya niyu, su meupiya ka peg-ugpe din duma kaniyu, 17 dumaa niyu sikandin diye te gumawan te baley niyu, wey lungahi niyu ka talinga rin. Ne uripen niyud iya sikandin te intiru ne umul rin. Ne sikan ded degma himuwa niyu te uripen niyu ne malitan. 18 Kene kew sagsahukul ne egbehey te kaligwangan te uripen niyu, su nakapamakey ma sikandin kaniyu te hen‑em ne leg‑un, wey nakahastu kew re te katenge ne eleg ne igsuul te sabeka ne suluhuanen. Ke eggimuwen niyu sika, egpanalanginan te Magbebaye ne Manama niyu ka langun ne eggimuwen niyu.”

19  ✡ Iks 13:12.Ne ingkahiyan e man‑e ni Muwisis ka me kabuhalan ni Israil, “Ilein niyu para te Magbebaye ne Manama ka langun ne panganey te me baka wey karniru niyu. Ne kene niyu gamita te egtrabahu ka panganey te me baka, wey kene niyu aluti ka panganey te me karniru. 20 Ke kene, keena niyu mule wey te me pamilya niyu ka seini ne me ayam diye te inged ne egsimbaan niyu te Magbebaye ne Manama, diye te inged ne eg-alamen din. 21 Piru kene niyu seini ipanubad diye te Magbebaye ne Manama niyu ke nabalbalangan; butud ma wey se lepu, wey te duma pad ne klasi te deet. 22 Keena niyu re seini diye te me lungsud niyu. Ne egkaayun man‑e ne egkeen kayi ka langun ne etew—in-isip ma ne malindit wey se malinis, iling te egmangekeen kew te ngalap te usa. 23  ✡ Hin 9:4; Lib 7:26-27; 17:10-14; 19:26; Diy 12:16-23.Piru kene kew keen te langesa kayi; ulei niyu re seini diye te tane iling te weyig.”