1 “Seini ka me balaud ne ipanengneng nu te me etew. 2  ✡ Lib 25:39-46.Emun ke egbebeli kew te uripen ne Hibruwanen, hen‑em de ne leg‑un sikandin ka egkeuripen niyu, wey te igkapitu ne leg‑un, lekei niyud e sikandin ne ware egkabayaran din. 3 Ne emun ke neuripen sikandin ne kanakan pad, eg-awe sikandin ne kanakan ded. Ne emun ke nakaasawe e sikandin human neuripen, egkaruma rin ded ka asawa rin te peg-awe din. 4 Ne emun ke impaasawaan sikandin te ahalen din, wey duen e anak dan, keilangan ne iggaat ka asawa rin wey ka me anak din diye te ahalen din. Sikandin de sabeka ka egpakaawe. 5 Piru ke egkahi ka uripen te kene sikandin eg-awe su inggeyinawaan din ka ahalen din, ka asawa rin, wey ka me anak din, 6 keilangan ne egpamalehetan din seini diye tangkaan te Manama.* Kahiyen te duma ne diye kun sikandin eg-uyana te me talewukum. Eg-uyanen sikandin te ahalen din diye te tangkaan te Manama, wey diye te marani te sungkaleg te gumawan eglungahan ka talinga rin te us-us. Puun due, egkeuripen naan de iya sikandin te ahalen din wey kenad sikandin egpakaawe.

7 “Emun ke igbelegye te etew ka anak din ne malitan eyew igpeuripen, kenad egpakaawe ka malitan. Iyan de egpakaawe ka me lukes ne egkengeuripen. 8 Piru ke kene igkatelesi ka malitan te ahalen din, egkaayun ded ne igpalekat sikandin te karumaan din. Ware katenged te ahalen din ne egbelegye kandin diye te mahaliyug, su kene ne meupiya ka peglayam din te malitan. 9 Emun ke imbeli rin ka uripen ne malitan eyew igpaasawa te anak din, keilangan ne eg-isipen din sikandin ne malehet ne anak din. 10 Ne emun ke egduruwey ka lukes, keilangan ne egbehayan din ded te egkakeen wey manggad ka tapey ne asawa rin, wey egguliran din ded degma. 11 Ne emun ke kene din eggimuwen seini se tatelu diye te tapey ne asawa rin, keilangan ne egpaween ka malitan ne ware egkabayaran.”

12  ✡ Lib 24:17.“Seeye se eggumi wey egpakapatey te etew, keilangan ne eggimatayan. 13  ✡ Num 35:10-34; Diy 19:1-13; Huswi 20:1-9.Piru ke ware din tuyui te eggimatey ka etew, wey intuhutan ku seini ne egkeyitabu, egpakaaput sikandin diye te inged ne igtahahe ku te iling due ne samuk. 14 Piru ke intuyuan din te eggimatey ka etew, dakepa niyu sikandin wey himatayi niyu, minsan pad eg-aput sikandin diye te altar ku.

15 “Ne seeye se eggumi te amey wey ke iney rin, keilangan ne eggimatayan.

16  ✡ Diy 24:7.“Ne seeye se egdakep te etew, keilangan ne eggimatayan, minsan ke imbelegye din ka etew wey ke nasapenan naa ne diye te kandin.

17  ✡ Lib 20:9; Mat 15:4; Mar 7:10.“Ne seeye se egdilus te amey wey ke iney rin, keilangan ne eggimatayan.

18 “Emun ke due egpeehetey ne indukduk te sabeka ka duma rin te batu, wey ke insuntuk din naa ne ware ded migpatey, ne egpekeyibat-hibat naan de man‑e, 19 kene egkarusaan ka miggumi kandin ke egpekeenew e ka etew wey egpekeyipanew e diye te lihawangan minsan egtutuked de. Piru keilangan ne egbayaran din ke pila ne aldew ka ware natrabahuwi te seeye se napaddel, wey keilangan ne egtangguwen din sikandin taman te egkeulian e.

20 “Emun ke eglampesan te sabeka ne etew ka uripen din ne malitan wey ke lukes naa, wey sahuhune ne egpatey sikandin, keilangan ne egparusaan ka etew. 21 Piru ke egkeuyag pad ka uripen te sabeka ne aldew wey ke daruwa ne aldew naa, keilangan ne kene egparusaan ka etew, su sikandin iya ka kamuney te uripen.† Te Hibruwanen: seleppi.

22 “Ke due egpeehetey ne nakasangkiyat te egkaberes wey nalanlanan‡ Te Hibruwanen: wey miglihawang e ka me anak din. e ka malitan, piru warad duma ne mareet ne eggeramen din, keilangan ne egbayaran te nakasangkiyat ke pila ka egbuyuen te asawa te malitan sumale te in-uyunan degma te me talewusey. 23 Piru ke masumpit ka eggeramen te malitan, keilangan degma ne eglegparan ka nakasangkiyat te masumpit. Ke egpatey ka malitan, eggimatayan degma sikandin. 24  ✡ Lib 24:19-20; Diy 19:21; Mat 5:38.Ka nakabutud te senge-etew, egbuturen degma; ka nakabingew, egbingawan degma; ka nakarereet te belad wey ke paa te senge-etew, egdereetan degma ka belad wey ke paa rin.§ Te Hibruwanen: mata te mata, ngipen te ngipen, belad te belad, paa te paa. 25 Ka nakatutung, egtutungen degma; ka nakapali, egpalian degma; ka eggumi te senge-etew, eggumian degma.* Te Hibruwanen: tutung te tutung, pali te pali, laplap te laplap.

26 “Ke inlampesan te sabeka ne etew ka mata te uripen din ne lukes wey ke malitan naa, wey nabutud e sikandan, keilangan ne eglekaan din ka uripen eyew mahabayad te mata rin ne nabutud.

27 “Ke nabingawan din man‑e ka uripen din, keilangan ne eglekaan din e ka uripen eyew mahabayad te ngipen din ne nabingew.”

28 “Emun ke egpakasungey ka baka te etew wey migpatey e, keilangan ne egbatuwen ka baka taman te egpatey, piru kene igpakeen ka ngalap. Kene egkaayun ne egsenditan wey egpabayaren ka kamuney te baka. 29 Piru ke tapey e egpanungey ka baka piru imbalahad de te kamuney minsan ke impanpanayan e sikandin, keilangan ne egbatuwen ka baka taman te egpatey, lagkes ka kamuney. 30 Piru ke egpewusey re ka napatayan, keilangan ne egbayaran din ke pila ka egbuyuen dan eyew kenad sikandin eggimatayan.† Te Hibruwanen: iglekat te umul rin. 31 Minsan ke bate de ka egkapatey te baka, iling ded iya man‑e ne balaud ka eg-ikulen. 32 Ke uripen ka egkapatey te baka, keilangan ne egbayad ka kamuney te baka te kentiddad ne tatelu ne pulu (30) ne pelata diye te ahalen te uripen, wey egbatuwen ka baka taman te egpatey.

33 “Emun ke due inlungag te etew ne ware tel-eb, wey ke ware din tel-ebi, wey due egkeulug ne baka wey ke asnu naa, 34 keilangan ne egbayaran te miglulungag ka neulug ne ayam, wey kandin e ka napatey ne ayam. 35 Emun ke due baka te sabeka ne etew ne egpakapatey te baka degma te senge-etew, keilangan ne igbelegye dan ka neuyag ne baka wey egbaaren dan ka halin, wey egsulayen dan degma ka baka ne namatey. 36 Piru ke tapey e ne egpanungey ka seeye ne baka piru imbalahad de te kamuney, keilangan ne egsaliyuwan din te manekal ne baka ka napatey te baka rin. Ne kandin e ka napatey ne baka.”