1 Ne impalibed ad e man‑e dumaa te etew diye te gumawan te timplu ne dapit te igsile, piru nalekeban e seeye. 2 Ne ingkahiyan a te Magbebaye ne Manama, “Keilangan ne eglekeban layun seini ne gumawan. Kene seini egkaayun ne eglukatan wey kene degma egkaayun ne due eglasud-lasud kayi, su sikeddi se Magbebaye ne Manama te Israil, nakalasud e ma te seini ne gumawan wey migmatulus seini. 3 Ka pangulu re te Israil ka egkaayun ne egpinnuu kayi ne bayaanan, eyew egkeen te me pegkeen ne inhalad kayi te keddi. Egpakalasud sikandin wey egpakalihawang ne diye egbaye te likansu ne bayaanan.”

4 Ne in-uyan a te etew diye te egkatangkaan te timplu wey diye key migbaye te gumawan ne dapit te igkahibang ne balabahan. Te pegtengteng ku, nakita ku ne napenu te maresen ne katelesan te Magbebaye ne Manama ka seled te timplu, wey miglangkeb a. 5 Ne ingkahiyan a te Magbebaye ne Manama, “Etew, pammineg ka ayad-ayad te langun ne iglalag ku keykew meyitenged te me balaud wey me suhu kayi te timplu. Tantanuri nud iya ke hentew ka egkaayun ne eglasud kayi wey ke hentew ka kene egkaayun. 6 Kahii nu ka me masinupaken ne me Israilita te migkahi a se Magbebaye ne Manama: He me Israilita, peen-enengi niyud e ka mallindit ne me hinimuwan niyu. 7 Inlinditan niyu ka timplu ku te timpu ne mighalad kew te me tabe, langesa, wey me pegkeen, su impalasud niyu ma ka me lapu ne makalelanget se hinimuwan, wey ware migpalintutuu keddi. Insupak niyu ka me balaud ku tenged te mallindit ne me hinimuwan niyu. 8 Sikaniyu ma perem ka eleg ne egbantey te me matulus ne kasangkapan ku, piru iyan niyu nasi impabantey te timplu ku ka me lapu.

9 “Purisu egkahi a se Magbebaye ne Manama te kene egkaayun ne eglasud te timplu ka minsan hentew ne lapu ne ware migpalintutuu keddi, minsan ka me lapu ne mig-ugpe duma kaniyu.”

10 Ne migpabulus-bulus ka Magbebaye ne Manama ne migkahi keddi, “Ne meyitenged te me kabuhalan ni Libi ne mig-inniyug keddi wey mig-apil te duma ne me Israilita ne migsimba te me diyus-diyus dan, eglegparan ku iya sikandan tenged te me sale dan. 11 Sikandan perem ka egpamakey diye te timplu ku isip me talagbantey te gumawan, talaglape te egtutungen ne igmanubad, wey te duma pad ne halad te me etew. Ne sikandan degma perem ka talagtanggu te me etew. 12 Piru tenged su migsimba sikandan te me diyus-diyus wey seeye ka egpuunan ne nakasale ka keet-etawan ku, egpahunlibet a se Maresen ne Magbebaye ne Manama ne eglegparan ku iya sikandan. Sikeddi se Magbebaye ne Manama ka miglalag kayi. 13 Kenad e sikandan egkaayun ne egpamakey keddi isip me talagpanubad. Ne kenad e degma sikandan egkaayun ne eggen-gen te me matulus ne kasangkapan ku wey te me halad. Egpaantusen ku sikandan te hilew tenged te mallindit ne me hinimuwan dan. 14 Eggimuwen ku naan de sikandan ne talagbulig te langun ne himu diye te timplu.”

15 Ne migpabulus-bulus ka Magbebaye ne migkahi, “Piru egkaayun mule ne egpamakey keddi ka me talagpanubad ne me kabuhalan ni Saduk ne iyan migbebantey te timplu ku te timpu ne mig-inniyug keddi ka me Israilita. Egkaayun mule sikandan ne egpanubad kayi te keddi te me tabe wey langesa. Sikeddi se Magbebaye ne Manama ka miglalag kayi. 16 Sikandan de ka egkaayun ne eglasud te timplu ku, wey egparani te altar eyew egpamakey keddi, wey ka eggimu te langun ne matulus ne himu ne igpeyimu ku kandan. 17  ✡ Iks 28:39-43; Lib 16:4.Ke eglasud sikandan diye te igkarangeb ne lama te timplu,* Malig-et seini ne lama ne diye te egkatangkaan te Matulus ne Sinabeng diye te timplu. keilangan ne egsaluub sikandan te linu. Kene sikandan egkaayun ne egsaluub te kumbale ne inggimu puun te bulbul te ayam taheed te egpamakey sikandan diye te seled te timplu. 18 Ne keilangan ne eglelangkus sikandan te linu, wey egsaluub te malepet ne salual ne igpariralem ne linu red degma. Kene sikandan egkaayun ne egsaluub te minsan nekey ne egpakapalimuseng kandan. 19  ✡ Lib 16:23.Ne emun eglihawang sikandan diye te lama ne inlibulungan te me etew, keilangan ne egluungen dan pad ka insaluub dan te migpamakey, wey igtahu dan de diye te matulus ne sinabeng. Ne egsaluub naan de sikandan te lerew ne me kumbale dan. Te sika ne paahi, kene egpakamenu te me etew ka pegkamatulus te me kumbale dan.† Impalintutuuwan dengan ne ka lerew ne me etew, egkapatey ke egpakasamsam te matulus ne kasangkapan.

20 “Ne keilangan degma ne kene sikandan egpatabulug, piru kene degma egkaayun ne egpamalayaten dan ka bulbul ran, ke kene, egpatemtempuhan dan de seini. 21  ✡ Lib 10:9.Ne keilangan degma ne kene sikandan eg-inum te binu ke eglasud sikandan diye te igkarangeb ne lama te timplu. 22 Ne kene sikandan egkaayun ne egpangasawa te balu wey ke malitan naa ne in-engkeran te asawa, ke kene, iyan dan de iya egpangasaween ka malitan ne ware pad iya neyilabeti wey Israilita red degma. Ne emun ke balu, keilangan ne sikan de iya man‑e se balu te talagpanubad.

23  ✡ Lib 10:10.“Ne keilangan ne egpanuluen dan ka keet-etawan ku ke nekey ka kaleinan te matulus wey te kene ne matulus, ke nekey ka malinis wey ke nekey ka malindit. 24 Ke due me apulan, ka me talagpanubad ka eggukum wey egpamuhawang ne igpeikul te me balaud ku. Keilangan ne egtumanen dan ka me suhu ku, wey ka me tulumanen meyitenged te sahakeen. Ne keilangan ne eg-ileen dan ka pegkamatulus te Aldew te Peggimeley.

25 “Keilangan ne kene dan eglinditan ka pegkeetew ran pinaahi te pegparani te minatey, angin e ke amey wey ke iney ran naa ka migpatey, wey ke anak dan naa wey ke suled dan naa ne lukes, wey ke atebey ran naa ne ware pad nakaasawa. 26 Ne emun ke egpakahen-gen sikandan te minatey, keilangan ne egseel sikandan te pitu ne aldew ne human pad man‑e sikandan egmalinis. 27 Ne emun ke eglasud sikandan diye te igkarangeb ne lama te timplu ka egpamakey, keilangan ne egpanubad pad sikandan eggun‑a eyew te peglinis te sale dan. Sikeddi se Magbebaye ne Manama ka miglalag kayi.”

28  ✡ Num 18:20.Ne migpabulus-bulus ka Magbebaye ne Manama ne migkahi keddi, “Ware tane ne egkapanunud te me talagpanubad te Israil, su sikeddiey e mismu ka egbehey te me keilanganen dan. 29  ✡ Num 18:8-19.Iyan dan egkeenen ka me halad ne egkakeen ne egpuun te egketuen ne pinamula, me halad ne iglinis te sale, wey me halad ne igbayad te sale. Kandan e ka langun ne halad te me Israilita. 30 Ka amana ne meupiya te an-anayan ne egkahaani niyu, wey ka langun ne ighalad niyu, egpekeendiyad e te me talagpanubad. 31  ✡ Lib 22:8.Ne keilangan ne kene sikandan egkeen te minsan nekey ne manuk-manuk wey te me mananap ne migpatey re due, wey ke inggimatayan naa te lein ne mananap.”