Ka baseen ni
Isra
Igpewun‑a
Ka baseen ni Isra, hendue te sumpul red te Me baseen te Krunikas. Nahuhud kayi ka meyitenged te peg-uli te duma ne me Hudiyu ne naddakep diye te Babilunya, wey ka pegpalibed te keugpe wey pegsimba diye te Hirusalim. Nabaad seini te tatelu: 1.) Ka pegpeuli ni Siru ne Hari te Pirsya te seeye se hun‑a ne punduk te me Hudiyu ne naddakep ne diyad te Babilunya. 2.) Ka pegbalew-balew pegpasasindeg te timplu wey ka peghalad kayi, wey ka pegpalibed te pegsimba te Manama diye te Hirusalim. 3.) Ka peg-uli diye te Hirusalim te seeye se lein e man‑e ne punduk te me Hudiyu ne impanguluwan ni Isra, ka sabeka ne mangngateu te Balaud te Manama. Nakabulig sikandin te me Israilita te pegpalibed te me tuluuwen wey nabatasan dan, eyew kene dan egkeengkeran ka pegsimba te malehet ne Manama.
Ka nenasulat te seini ne baseen
Ka hun‑a ne punduk te me Hudiyu ne nekeuli puun te pegkarakep 1:1–2:70
Ka pegbalew-balew pegpasasindeg te timplu wey ka peghalad kayi 3:1–6:22
Ka peg-uli ni Isra wey te duma ne naddakep 7:1–10:44
1
Ka pegpeuli ni Hari Siru te me Hudiyu
1 ✡ Hir 25:11; 29:10.Te an-anayan ne leg‑un te peghari ni Siru te Pirsya, impuwasan ka suman-suman din te Magbebaye ne Manama eyew egpakasulat te sabeka ne pegpataha te intiru ne migharian din. Neyitabu seini eyew egkatuman ka lalag te Magbebaye ne Manama pinaahi ki prupita Hirimiyas.
2 ✡ Isa 44:28.Seini ka insulat ni Siru ne Hari te Pirsya: “Ka Magbebaye ne Manama ne iyan ka Manama ne diye te langit, ka migbehey keddi te langun ne migharian kayi te kalibutan. In-alam a nikandin te pegbalew-balew pegpasasindeg te timplu para kandin diye te Hirusalim, ne sakup te Huda. 3 Sikaniyu se langun ne keet-etawan din, egkaayun e ne eg-uli diye te Hirusalim. Balbalawi niyu te pegpasasindeg ka timplu te Magbebaye ne Manama, ka Manama te Israil ne insimba diye te Hirusalim. Egdumaan kew perem langun te Manama niyu. 4 Ka minsan hentew te keet-etawan din ne naddakep dengan ne egkeilangan te bulig eyew egpekeuli, keilangan ne ka me sumbaley rin, egbehey kandin te pelata, bulawan, me kasangkapan, me ayam, wey egbehey pad man‑e sikandan te duma ne me dasag para te timplu te Manama diye te Hirusalim.”
5 Ne ka me pangulu te me pamilya* Te Hibruwanen: ka lalag ne “me ulu te me amey” iyan igpasabut ka “pangulu te me kabuhalan.” ne me kabuhalan ni Huda wey ni Binhamin duma te me talagpanubad wey te me Libita, lagkes seeye se langun ne impuwasan te Manama ka me suman-suman, migpangandam e ne eggendiye te Hirusalim eyew te pegbalew-balew pegpasasindeg te timplu te Magbebaye ne Manama. 6 Ne imbehayan sikandan te me sumbaley ran te me kasangkapan ne pelata, bulawan, me kasangkapan ne keilanganen, me ayam, me mahal ne kasangkapan, wey duma pad ne dasag para te timplu.
7 Impeuli degma ni Hari Siru ka me kasangkapan te timplu te Magbebaye ne Manama ne diye te Hirusalim ne in-uyan ni Hari Nibukadnisar ne intahu din diye te timplu te me diyus-diyus din. 8 Ne impabehey e seini ni Siru ne Hari te Pirsya diye ki Mitridatis ne talaggen-gen te seleppi. Ne inseel rin e seini wey imbehey rin e ki Sisbasar ne gubirnadur te Huda. 9 Ne seini ka kasuluhan te me kasangkapan: tatelu ne pulu (30) ne bulawan ne pelenggana, sabeka ne libu (1,000) ne pelata ne pelenggana, daruwa ne pulu wey siyam (29) ne kasangkapan ne pelata, 10 tatelu ne pulu (30) ne bulawan ne yahung, 410 ne pelata ne yahung, wey sabeka ne libu (1,000) te duma pad ne me kasangkapan.
11 Migginguma te 5,400† Ka kasuluhan te kasangkapan ne nasulat te birsikulu 9-10 ware de migginguma te 5,400, tenged te ware nakumplitu te egsulat ka me kasangkapan. ka langun ne kasangkapan ne bulawan wey pelata. Impanguyan seini enni Sisbasar wey te duma te peg-uli dan diye te Hirusalim puun te pegdakep wey peg-uyan kandan diye te Babilunya.