10
1 Mekeyid‑u-hid‑u seeye se miggimu te kene ne eleg ne me balaud
ne migdeeg-deeg te keet-etawan.
2 Miggimu kew te me balaud te peg-awe te katenged
te egkengaayu-ayu, te me balu, wey te me ilu
eyew egkaahew niyu ke nekey ka diye te kandan.
3 Nekey naa ka eggimuwen niyu ke eglegparan ku sikaniyu,
pinaahi te nasud ne egpuun te mariyu iling te kekesehi ne bagyu?
Hentew naa ka eg-aputan niyu eyew egpakabulig kaniyu,
wey hendei niyu naa igtaleu ka karatuan niyu?
4 Egpatey kew diye te giraanan wey ke egkarakep naa.
Piru minsan pad due, kene ded iya man‑e egkabewu ka langet te Magbebaye ne Manama;
andam ded iya man‑e sikandin ne egparusa kaniyu.
Inggamit te Manama ka Asirya
5 ✡ Isa 14:24-27; Nah 1:1–3:19; Sup 2:13-15.Migkahi ka Magbebaye ne Manama,
“Mekeyid‑u-hid‑u ka me matig-Asirya ne egpekeiling te lampes ne eggamiten ku te peglegpad te seeye se ingkabelu ku.
6 Egpalusuran ku te me matig-Asirya seeye se ware migpalintutuu keddi ne nasud ne ingkabelu ku.
Egsuhuen ku sikandan te peg-ahew te karatuan
wey te pegdiek-diek te keet-etawan iling te basak diye te deralanen.”
7 Piru ware nakanengneng ka Hari te Asirya ne inggamit de sikandin te Magbebaye ne Manama.
Iyan din tuyu ka pegdereet wey peggule te masulug ne me nasud.
8 Su migkahi ma sikandin,
“Kene naa ne iling te me Hari ka me kumandir te me sundalu ku?
9 Natalu ku ka me siyudad te Kalnu wey Karkimis.
Natalu ku degma ka me siyudad te Hamat wey Arpad,
lagkes ka Samarya wey Damasku.
10 Natalu ku ka me migharian ne migsimba te ingkulit ne me larawan
ne susuluhi pad du te ingkulit ne me ula-ula diye te Hirusalim wey te Samarya.
11 Egdereetan ku degma ka Hirusalim wey ka ingkulit ne me larawan diye
iling te pegdereet ku te Samarya wey te ingkulit degma ne me larawan diye.”
12 Ke egkeimpusan e te Magbebaye ne Manama te egdusa ka nangugpe diye te Bubungan ne Siyun* Te Hibruwanen: Siyun. (Sakup te Hirusalim ka Bubungan ne Siyun). wey diye te Hirusalim, egdusaan din e ka Hari te Asirya tenged su hambuhen sikandin wey mapegpeggasal. 13 Su migkahi ma sikandin,
“Neyimu ku seini tenged te keseg ku wey te katagseb, wey tenged su due salabutan ku.
Impariyu ku ka me etew puun te me nasud dan
wey in-ahew ku ka me karatuan dan.
Iling a te manekal ne turu ne baka
ne migdiek-diek te me Hari te sika ne me nasud.
14 Ne impanguwa ku ka langun ne karatuan te me nasud kayi te kalibutan
iling te migpanguwe e re te me atelug te bayaku diye te salag.
Warad iya iney ne migpalpalakpak wey ke migtuktuk naa keddi,
tenged su ware iya egpakaatu ne egsukul keddi.”
15 Piru migkahi ka Magbebaye ne Manama,
“Labew naan pad ka wasey wey ke gabas naa te etew ne miggamit kayi?
Ka tuked naa ka egkayew te etew ne iyan miggen-gen kayi?”
16 Purisu egpahaseen te Amana ne Maresen ne Magbebaye
seeye se mannekal ne me sundalu te Hari,
wey egdereetan din iya ka langun ne nakapabantug te Hari wey te me sundalu rin.
Egpekeiling sikandan te intutung diye te migkanlabkanlab ne hapuy.
17 Egkeyimu ne iling te egkalegleg ne hapuy ka kalayag te Israil
ne iyan ka Matulus ne Manama.
Egkatutung wey egkewugmas kayi ka me balunseri wey me sapinit, te senge-kaaldew re.
18 Ne egdereetan te Magbebaye ne Manama ka katelesan te puwalas,
egdereetan din ka tane ne dakel se eg-uma.
Egkaawe ka geem te Hari iling te egderalu ne etew ne egmahase e.
19 Pila-pila naan de ka me kayu ne egkasame diye te puwalas din wey egkaseel naan de seini te bate.
Ka peglibed te nenasame
20 Te sika ne aldew, ka nenasame ne keet-etawan te Israil kenad e egsalig te me nasud ne migdereet kandan, ke kene, eglehet-lehet e sikandan egsalig te Magbebaye, ka Matulus ne Manama te Israil. 21 Ne eglibed ka pila-pila ne nasame ne kabuhalan ni Hakub eyew egpariralem diye te Maresen ne Manama ran. 22 ✡ Rum 9:27.Su minsan iling kasulug te pantad te dahat ka keet-etawan te Israil, deisek naan de ka egpakalibed diye te Manama. Intahahe e ka matareng ne pegdereet ne eleg kandan. 23 Su ka Magbebaye ne iyan ka Amana ne Maresen ne Magbebaye, nekewukum e ne egdereetan ka intiru ne tane te Israil.† Ka pegsabut te duma ne mig-iskuyla te Bibliya, iyan igpasabut te Hibruwanen se: Egdereetan ka intiru ne kalibutan.
Ka pegdusa te Magbebaye te Asirya
24 Purisu migkahi ka Magbebaye, ka Amana ne Maresen ne Magbebaye, “He keet-etawan ne mig-ugpe te Hirusalim, kene kew kaaldek te me matig-Asirya minsan egde-deehen kew nikandan iling te inggimu te me matig-Ihiptu kaniyu. 25 Su te kene egkaluhey, egkabewu e ka langet ku kaniyu, wey iyan kud e egdereetan ka me matig-Asirya. 26 Sikeddi ka Amana ne Maresen ne Magbebaye, eglampesan ku sikandan iling te inggimu ku te me etew diye te Midiyan ne diye te Batu te Urib. Egdusaan ku ka me matig-Asirya iling te pegdusa ku te me matig-Ihiptu. 27 Te sika kangkuwa ne aldew, eg-aween kud e ka impatiang din kaniyu, wey ka yuggu ne insangen din kaniyu, wey egkahepu e sika tenged su egmaresen kew man e.”
Ka peglusud te me kuntere
28 Ne inlusuran te me kuntere ka lungsud te Ayat.‡ Ingngaranan degma te ‘Ay’ ka lungsud te Ayat.
Diye sikandan migbaye te Migrun,
wey intines dan ka me kasangkapan diye te Mikmas.
29 Te nakalapas e sikandan diye te beuhan,
miggimeley e sikandan diye te Giba te pegkamarusilem.
Nenaaldek ka me matig-Rama,
wey migpamallahuy ka keet-etawan te Gibiya, ka lungsud ni Saul.
30 Panguleyi kew, keet-etawan te Galim!
Pammineg kew, keet-etawan te Laysa!
Tabak kew, keet-etawan te Anatut.
31 Migpamallahuy e ka me mahinged te Madmina wey te Gibim eyew egpamitew te inged ne egkaaputan dan.
32 Kuntee ne aldew diyad e migsanggel te lungsud te Nub ka me kuntere,
wey egkaykayawen dan ka me kemu dan
diye te Bubungan ne Siyun ne iyan ka siyudad te Hirusalim.
33 Piru pitew kew, egdereetan sikandan te Amana ne Maresen ne Magbebaye pinaahi te makaliyas-liyas ne geem din.
Egpekeiling ka Asirya te kayu ne impanempug se me sugpang,
iling te mallayat ne kayu ne nenapeled wey nenakariralem e.
34 Egpameleren e te Magbebaye ne Manama ka mallayat ne kayu diye te puwalas te Libanun pinaahi te wasey rin
eyew egkengaawe e ka memateles ne kayu diye.
✡10:5 Isa 14:24-27; Nah 1:1–3:19; Sup 2:13-15.
*10:12 Te Hibruwanen: Siyun. (Sakup te Hirusalim ka Bubungan ne Siyun).
†10:23 Ka pegsabut te duma ne mig-iskuyla te Bibliya, iyan igpasabut te Hibruwanen se: Egdereetan ka intiru ne kalibutan.
‡10:28 Ingngaranan degma te ‘Ay’ ka lungsud te Ayat.