63
Ka pegsuli te Manama
1 ✡ Isa 34:5-17; Hir 49:7-22; Isi 25:12-14; 35:1-15; Amu 1:11-12; Ubd 1-14; Mal 1:2-5.Hentew‑a sika se egginguma ne egpuun te Busra ne sakup te Idum ne migkukumbale te malalab?
Hentew‑a sika se migsaluub te kumbale te Hari ne miggipanew ne dakel se geem?
Sikandin ka Magbebaye ne Manama ne migpanengneng te kapanaluwan te keet-etawan din,
wey due geem te pegluwas.
2 Mania te malalab ka kumbale din
iling te kumbale te etew ne talagdiek te behas te paras?
3 ✡ Imp 14:20; 19:15; Imp 19:13.Ne migtabak ka Magbebaye, “Indiekan ku ka me nasud
iling te behas te paras tenged te langet ku.
Ware duma ku te migdiriek.
Ne impanlagsikan ka kumbale ku te langesa ran,
sikan naa ka neelin ne langesa.
4 Su miggingume e ka timpu ne egsulian ku ka me kuntere ku
wey ka aldew ne egluwasen ku ka keet-etawan ku.
5 ✡ Isa 59:16.Neinu-inu a te pegkakita ku ne ware egbulig keddi.
Purisu sikeddiey e ka migluwas te keet-etawan ku pinaahi te geem ku.
Ka langet ku ka nakamanekal keddi ne migpanalu a.
6 Tenged te belu ku, intamtamanan ku di-dieki ka keet-etawan,
taman te nenakabahed de sikandan iling te nenewubug.
Imparalanag ku ka langesa ran diye te tane.”
Ka keupiya te Magbebaye te Israil
7 Igpangguhud ku ka geyinawa te Magbebaye ne kene egkabalbalawan.
Egdeyrayen ku sikandin tenged te inggimu rin kanta.
Masulug ka meupiya ne inggimu rin te keet-etawan te Israil tenged te keyid‑u rin wey geyinawa rin.
8 Migkahi ka Magbebaye ne Manama,
“Malehet iya ne keet-etawan ku sikandan,
me anak ku sikandan ne kene eg-akal keddi.”
Purisu inluwas din sikandan.
9 Te langun ne peg-antus dan, mig-antus degma sikandin,
wey inluwas din sikandan pinaahi te panalihan ne diye te tangkaan din.
Tenged te geyinawa wey keyid‑u rin,
inluwas din sikandan
wey intanggu rin sikandan te aldew wey marusilem.
10 Piru migribildi sikandan te Magbebaye
wey nasundug e ka matulus ne Panisingan din.
Sikan naa, neyimu e ne kuntere dan ka Manama
wey migpakig-ehet e kandan.
11 Nataman, nakasuman-suman sikandan te miglihad ne me timpu,
ka timpu ni Muwisis ne suluhuanen te Magbebaye.
Mig-inse sikandan, “Hendeid bes e ka Magbebaye ne migpalapas kanta diye te dahat
duma ki Muwisis ne pangulu ta, ka egpekeiling te talagtameng te karniru?
Hendeid naa ka migpeuyan te matulus ne Panisingan diye ki Muwisis?
12 ✡ Iks 14:21.Hendeid e ka Magbebaye ne migbehey ki Muwisis te geem,
wey ka migbaad te dahat diye te tangkaan ta eyew egkeila sikandin te ware egtamanan?
13 Hendeid e ka migpangulu kanta te peglapas te dahat?
Nekeiling ki te me kudde ne diye migbaye te disirtu,
ne warad iya nakarugsu.
14 Imbehayan ki te Panisingan te Magbebaye te kalinaw
iling te me baka ne intuyuk patupang diye te napu ne dakel se egkatabtab.
Iling degma ka peg-inahak te Magbebaye kanta eyew egkabantug sikandin.”
Ka pegpeyid‑u-hid‑u
15 Pantawa key nikeykew puun due te langit,
ka matulus wey mateles ne ugpaan nu.
Hendeid naan e ka meupiya ne igkeupii nu ne eggimuwen para kanami
wey ka geem nu ne impakita nu dengan kanami?
Hendeid e ka geyinawa nu wey ka keyid‑u nu?
16 Su sikeykew ka Amey ney minsan ware key neileyi te apu ney
ne si Abraham wey si Hakub.
Malehet iya ne Amey ney sikeykew, Magbebaye,
ka Manluluwas ney puun pad dengan.
17 Magbebaye, mania te intuhut nu ne egpakasupak key te me pamaahi nu?
Mania te impakehal nu ka me pusung ney
ne iyan egpuunan ne naawe ka pegtahud ney keykew?
Balbalawi nu red ubag ka suman-suman nu wey bulihi key.
Keet-etawan key pad iya nikeykew.
18 Malepet de ne timpu ne iyan nakakamuney te timplu ka matulus ne keet-etawan nu,
piru indereetan seini te me kuntere ney.
19 Nekeiling key e te me etew ne ware nu iya mandui
wey hendue te kene key nikeykew ne keet-etawan.
✡63:1 Isa 34:5-17; Hir 49:7-22; Isi 25:12-14; 35:1-15; Amu 1:11-12; Ubd 1-14; Mal 1:2-5.
✡63:3 Imp 14:20; 19:15; Imp 19:13.