1  ✡ 2Har 23:36–24:6; 2Kru 36:5-7.Te timpu ne iyan pad Hari te Huda si Huwakim ne anak ni Husiyas, ingkahiyan a te Magbebaye ne Manama, 2 “Hendiye ka te me kabuhalan ni Rikab wey hinggata nu sikandan ne eggendiye te sabeka te me sinabeng te timplu, wey peinuma nu sikandan te binu.” 3 Purisu inggendiyaan kud si Haasaniyas ne anak ni Hirimiyas ne anak ni Habasiniyas, lagkes ka langun ne suled din wey anak din. Me kabuhalan sikandan langun ni Rikab. 4 Ne induma kud sikandan diye te timplu, wey immaseled kud diye te sinabeng te me hibateen te prupita ne si Hanan ne anak ni Igdaliyas. Ka seini ne sinabeng, diye te dibabew te sinabeng ni Maasiyas ne anak ni Salum ne talagtameng te gumawan te timplu. 5 Ne migtahu a te me ubab wey me pitsil ne napenu te binu diye te tangkaan te me kabuhalan ni Rikab wey ingkahiyan ku sikandan, “Inum kew te binu.”

6 Piru migtabak sikandan, “Kene key eg-inum te binu, su impanpanayan key te kaap-apuan ney ne si Hunadab ne anak ni Rikab, wey ka me kabuhalan ney te kene key egpeinumen te binu. 7 Ne ingkahiyan key pad man‑e nikandin te kene egpabebalayen, egpakameten, egpepammuleen minsan parasan de. Diye key re nikandin egpeugpaa layun te me balungbalung te intiru ne umul ney. Ne emun ke egtumanen ney seini, egpabulus key eg-ugpe te inged ne eg-aranan ney. 8 Ne intuman ney iya ka langun ne impaney-paney kanami te kaap-apuan ney ne si Hunadab ne anak ni Rikab. Ware key iya mig-inum te binu, ka me asawa ney, wey ka me anak ney ne me lukes wey me malitan. 9 Ware key migmambebaley te eg-ugpaan ney, wey ke migkamkamuney naa te me parasan, me kamet wey ke beni naa. 10 Diye key re nangugpe te me balungbalung. Intuman ney iya ka langun ne insuhu kanami te kaapuan ney ne si Hunadab. 11 Piru te inlusuran e ni Nibukadnisar ne Hari te Babilunya ka seini ne inged, naaldek key e te me sundalu te Babilunya wey te Asirya, purisu nakaplanu key ne eggendini te Hirusalim. Sikan naa ka kayi key en iya mig-ugpe te Hirusalim.”

12 Nataman impanengneng ad te Magbebaye ne Manama, 13 “Hipanew ka wey kahii nu ka keet-etawan te Huda wey Hirusalim: Mania te kene kew egpammineg wey egtuman te me suhu ku? 14 Intuman te kabuhalan ni Hunadab ka suhu din kandan ne kene eg-inum te binu, wey taman kuntee ware iya sikandan mig-inum te binu. Piru ware kew en iya mule migtuman keddiey minsan kapapila kud e sikaniyu guhuri. 15 Insuhu ku ka langun ne suluhuanen ku ne me prupita wey impeinniyug kew nikandan te maddeet ne me himu niyu, wey impeyimu te eleg. Impanpanayan kew nikandan ne kene egsimba wey ke egpamakey naa te me diyus-diyus, eyew egpakapabulus kew eg-ugpe te inged ne imbehey ku kaniyu wey te me kaap-apuan niyu. Piru ware kew en iya migpammineg keddiey wey ke miglinga-linga naa. 16 Intuman mule te me kabuhalan ni Hunadab ka insuhu kandan te kaap-apuan dan, piru ware kew mule migtuman keddiey. 17 Purisu igpasalerep kud sikaniyu se me matig-Huda wey matig-Hirusalim te karereetan ne inlalag ku kaniyu. Eggimuwen ku seini su ware kew ma migpammineg keddiey te migpakiglalag a kaniyu, wey ware kew migtabak te in-umew ku sikaniyu. Sikeddiey ka Amana ne Maresen ne Magbebaye ne Manama ka miglalag kayi.”

18 Nataman, ingkahiyan kud ka me kabuhalan ni Rikab te migkahi ka Amana ne Maresen ne Magbebaye ne Manama, ka Manama te Israil, “Intuman niyu ka langun ne insuhu kaniyu te kaap-apuan niyu ne si Hunadab. 19 Purisu, igsaad ku ne kene egkaawaan te kabuhalan ne egpamakey keddiey si Hunadab ne anak ni Rikab. Sikeddiey ka Magbebaye ne Manama te Israil ka miglalag kayi.”