1 Te neimpusan e ni Sulumun ka pegpasasindeg te timplu te Magbebaye ne Manama, ka palasyu rin, wey ka langun ne igkeupii rin te egpangimu, 2  ✡ 1Har 3:5; 2Kru 1:7.migpakite e man‑e kandin ka Magbebaye iling te diye sikandin te Gibyun. 3 Migkahi ka Magbebaye kandin, “Narineg ku ka peg-ampu nu wey ka pegpangananey nu keddiey. In-alam ku seini se timplu ne inggimu nu eyew egsimbaan niyu keddiey te ware egtamanan. Egtamengan ku wey egtantanuran ku seini te langun ne timpu. 4 Ne sikeykew, ke egmatinumanen ka keddi iling te amey nu ne si Dabid, wey ke egtareng ka te peg-ugpe nu, wey eggimuwen nu ka langun ne imbanasal ku keykew, wey egtumanen nu ka me tulumanen wey ka me suhu ku, 5  ✡ 1Har 2:4.egpepabulusen ku egpaharia te Israil ka me kabuhalan nu te ware egtamanan. Seini degma ka insaad ku te amey nu ne si Dabid te pegkahi ku, ‘Kene egkaawe ka kabuhalan nu ne eghari kayi te Israil.’ 6 Piru ke eg-engked ka wey ka me kabuhalan nu ne eg-ikul keddiey, wey kene kew e egtuman te me suhu ku wey te me balaud ne imbehey ku kaniyu, wey egpamakey wey egsimba kew te duma ne me manama, 7 egpaaween kud e ka keet-etawan ku ne me Israilita te tane ne imbehey ku kandan, wey egbalaharen kud seini se timplu ne in-alam ku eyew te pegpabantug te ngaran ku. Ne eglelemetan e wey egtampeleen e te langun ne keet-etawan. 8  ✡ 2Har 25:9; 2Kru 36:19.Ne egpatamtamanan kud egguhusa ka seini ne timplu, wey ka langun ne egmanlihad egkatanengan wey egkeinu-inu sikandan wey egkahi, ‘Mania te inggimu te Magbebaye seeye te seini ne tane wey te seini ne timplu?’ 9 Ne egtabak ka duma, ‘Neyitabu seini kandan su in-engkeran dan ma ka Magbebaye ne Manama ran, ne mig-angey te kaap-apuan dan puun te Ihiptu wey migpamakey sikandan wey migsimba te duma ne me manama. Ne tenged due, impeuyanan sikandan te Magbebaye te karereetan.’ ”

10 Ne migginguma te daruwa ne pulu (20) ne leg‑un ka pegpasasindeg ni Sulumun te timplu wey te palasyu rin. 11 Si Hiram ne Hari te Tiru ka migbehey kandin te me kayu ne sidar, wey sipris, wey bulawan ne keilangan din. Ne imbehayan degma ni Sulumun si Hiram te daruwa ne pulu (20) ne siyudad diye te inged te Galiliya. 12 Piru te impangendiyaan e ni Hiram ka me siyudad ne imbehey ni Sulumun kandin, ware din seini ikeupii. 13 Purisu migkahi e sikandin, “He suled, nekey ne klasi te me siyudad seini se imbehey nu keddiey?” Ne ingngaranan ni Hiram ka seeye ne me inged te Kabul* Te Hibruwanen: Iyan igpasabut te lalag ne Kabul ka “ware karuan.” ne seini ka igngaran dan taman kuntee. 14 Ka malehet, hep‑at e ne libu (4,000) ne kilu te bulawan ka imbehey dengan ni Hiram ki Sulumun.

15 Seini ka guhuren meyitenged te pegpatrabahu te timplu. Impehes ni Hari Sulumun ka me etew te egtrabahu te timplu te Magbebaye ne Manama, te palasyu rin, te pegbunel te tane diye te igsile dapit te siyudad, te alad te Hirusalim ne matikang wey makepal ne batu, wey te pegpasasindeg man‑e te me siyudad te Hasur, Migidu, wey Gasir. 16 (Dengan, inlusuran te Paraun ne Hari te Ihiptu ka Gasir—naahew wey insilaban din e seini. Impangimatayan din ka langun ne me Kanaanen ne mig-ugpe te sika ne siyudad. Ne imbehey rin e ka sika ne siyudad te anak din ne malitan, maharasag te kasal rin ki Sulumun. 17 Ne imbalbalawan ni Sulumun te egpasasindeg ka siyudad te Gasir.) Impasasindeg din degma ka diralem ne baad te lungsud te Bit-Hurun, 18 ka Baalat, wey ka Tamar ne diye te disirtu ne sakup te inged te Huda, 19 wey te duma pad ne me siyudad ne tinesanan te me kasangkapan din, me karwahi rin, wey ugpaanan te me kudde din. Ne impasasindeg degma ni Sulumun ka langun ne implanu rin ne eggimuwen diye te Hirusalim, diye te Libanun, wey diye te langun ne inged ne sakup te migharian din. 20-21 Duen pad kene ne me matig-Israil ne nasame diye te Israil. Sikandan ka me kabuhalan te me Amunihanen, me Hitihanen, me Pirisihanen, me Hibihanen, wey me Hibusihanen ne ware naamin te egpangimatey te me matig-Israil te peg-ahew ran te inged ne Kanaan. Impanguripen sikandan ni Sulumun wey impehes patrabahuwa taman kuntee. 22 Piru ware mule panguripena ni Sulumun ka me matig-Israil, ke kene, inggimu rin sikandan ne me sundalu rin, me upisyal rin, me pangulu wey me kepitan te me sundalu rin, wey me pangulu te me karwahi rin wey te egmangudde. 23 Due lalimma ne gatus wey lalimma ne pulu (550) kandan ne inggimu ni Sulumun ne me upisyal ne impiyalan din te me trabahanti ne miggimu te me himu rin.

24 Te neimpusan e ka palasyu ne impeyimu ni Sulumun para te asawa rin ne anak te Hari te Ihiptu, impaalin din e sikandin diye puun te Siyudad ni Dabid. Nataman impabunelan e ni Sulumun te tane ka diye te igsile ne dapit te siyudad.

25  ✡ Iks 23:17; 34:23; Diy 16:16.Ne katatelu te tagse leg‑un egpanubad si Sulumun wey eghalad para te keupianan diye te altar ne inggimu rin para te Magbebaye ne Manama, wey migtutung degma sikandin te insinsu diye te Magbebaye. Ne neimpusan din en iya ka timplu.

26 Ne migpeyimu man‑e si Hari Sulumun te masulug ne me barku diye te Isyun-Gibir, te Ilat ne marani te ilis te Malalab ne Dahat te inged te Idum. 27 Ne migpeuyan si Hiram te me suluhuanen din ne me mangngateu ne me trabahanti te barku duma te me suluhuanen ni Sulumun. 28 Ne nangendiye sikandan te Upir wey in-angey ran diye ka me sapulu wey hep‑at ne libu (14,000) ne kilu ne bulawan, wey in-uyan dan seini diye ki Hari Sulumun.