1 Sabeka ne aldew, migkahiyan ni Diyunatan ne anak ni Saul ka kanakan ne talag-uyan te panganiban din, “Kuwa kid. Eggendiye ki te kampu te me matig-Pilistiya ne seeye te talipag.” Piru ware din patahaa ka amey rin. 2 Te seeye ne timpu, diye si Saul te diralem te kayu ne egngaranan te granada ne diye te Migrun ne marani te Gibiya. Ne hen‑em ne gatus (600) ne sundalu ka me duma rin. 3 Sabeka te duma ni Saul iyan si Ahiyas ne migsaluub te ipud. Anak sikandin ni Ahitub ne suled ni Ikabud, ne anak ni Pinihas, ne anak ni Ili ne talagpanubad te Magbebaye ne Manama diye te Silu.

Ne ware nakataha ka me etew te miggipanew si Diyunatan. 4 Due dalama te tagse kakiliran te dalan ne egbayaan enni Diyunatan peendiye te kampu te me matig-Pilistiya. Ka limang ne dalama, egngaranan te Busis wey ka limang ne dalama, egngaranan te Sini. 5 Ne diye te igkahibang ne balabahan ka sabeka ne dalama, marani te Mikmas. Ne diye degma te igkakawanan ne balabahan ka sabeka ne dalama, marani te Giba.

6 Ingkahiyan ni Diyunatan ka kanakan ne talag-uyan te panganiban din, “Kuwa kid. Eggendiye ki te kampu te me matig-Pilistiya ne ware nenatulii.* Ka me etew ne ware natulii senge-kakuwa ne migpasabut te ware sikandan nekeila te Manama, su ilaan ka pegpatuli te migpalintutuu te Manama. Kema ke egbulihan ki te Magbebaye ne Manama, su ware egpakatigkel kandin te pegbehey kanta te kapanaluwan, minsan masalig ki wey ke deisek de.”

7 Ne migkahi ka talag-uyan te panganiban, “Himuwa nu ke nekey ka igkeupii nu, su egduma a keykew minsan nekey ka eggimuwen nu.”

8 Ne migkahi si Diyunatan, “Na, eggendiye kid wey egpakita ki kandan. 9 Ke egkahiyan ki nikandan, ‘Tahari key due,’ ne diye ki re iya egsesasindeg te nalengeran ta wey kene ki egtakereg diye te kandan. 10 Piru ke egkahi sikandan, ‘Takereg kew kayi,’ egtakereg ki iya su sika ka ilaan ne imbehey e te Magbebaye sikandan kanta.”

11 Purisu migpakita sikandan se daruwa diye te migbebantey ne me matig-Pilistiya. Ne migkahi ka me matig-Pilistiya, “Pitew kew! Due me Hibruwanen ne miglihawang puun te me lungag ne nangelesan dan.” 12 Ne in-umew si Diyunatan wey ka duma rin te me matig-Pilistiya ne migbebantey te dalan te Mikmas ne migkahi, “Takereg kew kayi su due igpapitew ney kaniyu.”

Ingkahiyan ni Diyunatan ka talag-uyan te panganiban din, “Iyal ka, sinundul ka keddi su imbehey e te Magbebaye sikandan diye te Israil.” 13 Ne migpangahapkap si Diyunatan wey migsinundul kandin ka talag-uyan te panganiban din. Indula ni Diyunatan ka me matig-Pilistiya wey nenapeled sikandan, wey impangimatayan e te talag-uyan te panganiban din. 14 Te hun‑a ne peglusud dan, daruwa ne pulu (20) ne etew ka napatey ran seled te me liware te teriyas ka kaluag. 15 Ne naalatan ka langun ne me sundalu ne matig-Pilistiya, ka seeye se diye te kampu, diye te kamet, wey ka seeye se me talagbantey, lagkes ka seeye se migmanlusud. Ne dutu, miglilinug e te makeseg wey nasublaan pad iya sikandan ne naalatan.† Te Hibruwanen: liyas puun te Manama.

16 Ka me talagtameng ki Saul diye te Gibiya ne diye te inged ne Binhamin, nakakita te pegkewukag te me matig-Pilistiya. 17 Ne ingkahiyan ni Saul ka me sakup din, “Seela niyu ka me sundalu wey pitawa niyu ke hentew ka ware kayi.” Te naseel ran e, nanengnengan dan ne ware si Diyunatan wey ka talag-uyan te panganiban din. 18 Ne ingkahiyan ni Saul si Ahiyas, “Uyana nu kayi ka Tahuanan te Kasabutan‡ Ka diye te sabeka ne sinulat, “Ipud” kene ne “Tahuanan te Kasabutan.” te Manama.” Te sika ne timpu, diye te me matig-Israil ka Tahuanan te Kasabutan. 19 Taheed te migpakiglalag si Saul te talagpanubad, nanasnasian e ne newukag ka me matig-Pilistiya diye te kampu ran. Ne ingkahiyan ni Saul ka talagpanubad, “Warad e timpu te peg-inse te Manama!” 20 Ne miglibulung si Saul wey ka me sundalu rin, wey nangipanew e sikandan ka egpakiggira. Ne nakita ran ne amana nalibeg ka me matig-Pilistiya wey egmemekeg-uney-uney e egmemekegtibbas ka tagse sabeka. 21 Te seini ne timpu, ka me Hibruwanen ne diye migdapig te me matig-Pilistiya wey migduma diye te kampu ran, diyad e man‑e migdapig te me matig-Israil ne sakup ni Saul wey ni Diyunatan. 22 Ne migpanalukunan e degma te me matig-Israil ne nangeles diye te me bubungan te Ipraim ka me matig-Pilistiya, te narineg dan ne namallahuy e ka me matig-Pilistiya. 23 Ne nakalihad pad diye te Bit-Abin ka egpahiggireey. Ne inluwas te Magbebaye ka me matig-Israil te seeye ne aldew.

24 Ne migmahuye ka me matig-Israil te seeye ne aldew tenged te saad ni Saul ne miggenendue, “Igdilus seeye se etew ne egkeen te kene pad egmarusilem, te kene e pad egpakasuli te me kuntere ku.” Purisu ware sabeka kandan ne migkeen te sika ne aldew. 25 Ne nangendiye te katalunan ka langun ne etew wey due teneb ne nakita ran diye te tane. 26 Piru ware minsan sabeka ne miggeram dutu tenged te kaaldek dan te saad ni Saul. 27 Piru ware nakarineg si Diyunatan te saad te amey rin ne keilangan ne igpatuman te me etew, sikan naa ka indallut din te teneb ka pupul te tuked din wey inggeraman din seini. Ne dutu, migmanekal e sikandin. 28 Ne migkahiyan sikandin te sabeka te me sundalu, “Migpehet-pehet pe ma migsesaad ka amey nu te me etew ne migkahi, ‘Igdilus seeye se etew ne egkeen te seini ne aldew.’ ” Sika iya ka egpuunan ne migmagguye ka me etew.

29 Ne migkahi si Diyunatan, “Nakasamuk de te keet-etawan ka amey ku! Pitawa niyu, meupiye e se peggeram-geram ku su miggeram e ma te deisek ne teneb. 30 Meupiya pad ke nangeen ka me etew te seeye se nenaahew ran puun te me kuntere dan te seini ne aldew, wey masalig bu pad perem ka napatey ta ne me matig-Pilistiya.”

31 Te seeye ne aldew, impangimatayan dan ka me matig-Pilistiya puun te Mikmas peendiye te Ayalun. Ne dutu migmahuye e ka me etew. 32 Sikan naa ka migmaag-ahawey e sikandan te nenaahew ran ne me karniru, me baka, wey impanggilang dan e seini. Ne ingkeen dan e ka ngalap ne duen pad langesa. 33  ✡ Hin 9:4; Lib 7:26-27; 17:10-14; 19:26; Diy 12:16,23; 15:23.Ne due nakanangen ki Saul, “Nakasale ka keet-etawan diye te Magbebaye pinaahi te pegkeen te ngalap ne due langesa.”

Ne migkahi si Saul, “Me talagsupak kew te kasabutan! Lilid kew te dakel ne batu kayi te lenged ku. 34 Pangendiye kew te me etew wey kahii niyu te egpeuyanen ka tagse sabeka te baka rin wey karniru, wey igpahilang kandan kayi wey igpakeen. Ne kene kew himu te sale diye te Magbebaye ne Manama pinaahi te pegkeen te ngalap ne duen pad langesa.” Purisu ka tagse sabeka te seeye ne karusileman migmanguyan te ayam wey inggilang dan seini. 35 Ne miggimu si Saul te altar ne tutunganan te igpanubad para te Magbebaye wey seeye ka hun‑a ne altar ne inggimu rin.

36 Ne migkahi si Saul, “Egtupangan ta te marusilem egpanalukuni ka me matig-Pilistiya wey eg-aminen ta sikandan egpangimatayi wey egpanguen ta ka langun ne kasangkapan dan taman te maselem.”

Ne migkahi sikandan, “Himuwa nu ke nekey ka insuman-suman nu ne meupiya.”

Piru migkahi ka talagpanubad, “Eg-inse ki pad te Manama.”

37 Ne mig-inse si Saul te Manama ne miggenendue, “Egtupangan ney naa egpanalukuni ka me matig-Pilistiya? Igpareeg nu naa sikandan kanami?” Piru ware migtabak ka Manama te sika ne aldew. 38 Ne migkahi si Saul, “Hendini kew, sikaniyu se langun ne pangulu te me sundalu,§ Te Hibruwanen: keet-etawan. su egnengnengan ta ke nekey ne sale ka neyimu ta te seini ne aldew. 39 Ne egpahunlibet a te manekal ne Magbebaye ne migluwas te Israil ne eggimatayan iya seeye se nakasale, minsan pad ke sika se anak ku ne si Diyunatan.” Piru ware sabeka te me etew ne migtabak kandin. 40 Ne ingkahiyan din ka langun ne matig-Israil, “Duen kew sasindeg te limang wey kayi key degma egsasindeg ki Diyunatan ne anak ku te limang.”

Ne ingkahiyan te me etew si Saul, “Himuwa nu ke nekey ka insuman-suman nu ne meupiya.”

41  ✡ Num 27:21; 1Sam 28:6.Purisu mig-ampu si Saul ne miggenendue, “He Magbebaye, ne iyan ka Manama te Israil, tabaka a nikeykew te eleg ne tabak.” Ne migpintut-pintut* Ka inggamit te pegpintut-pintut iyan ka “Urim” wey “Tumim” ne iyan ka me ngaran te daruwa ne matulus ne batu ne inggamit dengan te me talagpanubad te pegnengneng te igkeupii te Manama. si Diyunatan wey si Saul wey sikandan ka naalam wey kene ne ka me etew. 42 Ne migkahi si Saul, “Na, pintut-pintuta key ki Diyunatan.” Ne si Diyunatan ka naalam. 43 Ne mig-insaan ni Saul si Diyunatan, “Nangeni a ke nekey ka inggimu nu.”

Ne migtabak si Diyunatan, “Miggeram a te deisek ne teneb pinaahi te pupul te tuked ku. Egpatey ad bes iya seini.”

44 Ne migtabak si Saul, “Uya, egdusaan a perem te Magbebaye te mangune-kune ke kene ka egpatey, Diyunatan.”

45 Piru ingkahiyan te keet-etawan si Saul, “Eggimatayan bes mule si Diyunatan ne iyan nekeyimu te dakel ne kapanaluwan te Israil? Kene egkaayun! Migsaad key te manekal ne Magbebaye ne ware minsan sabeka ne egkarutdut ne bulbul rin, su imbulihan ma sikandin te Manama te neyimu rin te seini ne aldew.” Purisu naluwas te keet-etawan si Diyunatan te iling kayi ne paahi.

46 Ne warad e migpabulus si Saul ka miglupug te me matig-Pilistiya, wey nanguli e ka me matig-Pilistiya diye te inged dan.

47 Te timpu ne mighari si Saul te Israil, migpakiggira sikandin te langun ne kuntere din diye te nalein-lein ne inged: diye te Muwab, diye te Amun, diye te inged te Idum, wey te me Hari diye te Suba wey te me matig-Pilistiya. Ne minsan hendei sikandin egpakig-ehet, egpanalu iya sikandin. 48 Ne mabulut ne migpakiggira si Saul wey natalu rin ka me Amalikanen wey inluwas din ka me matig-Israil puun te seeye se migpangahew te me karatuan dan.

49 Ne ka me lukes ne anak ni Saul iyan si Diyunatan, si Isbi, wey si Malkisuwa. Ne ka me anak din ne me malitan iyan si Mirab, ka kakey wey si Mikal, ka hari. 50 Ne iyan asawa ni Saul si Ahinuwam, ne anak ni Ahimaas. Ka pangulu te me sundalu ni Saul iyan si Abnir, ne anak te anggam din ne si Nir. 51 Ka amey ni Saul iyan si Kis; wey ka amey ni Abnir iyan si Nir, ne me anak ni Abiyil.

52 Taheed te neuyag pad si Saul, due masumpit ne egpahiggireey ne me matig-Pilistiya wey me matig-Israil. Ne egsundaluwen ni Saul ke due egkakita rin ne manekal ne etew wey ke mabulut naa.