9
Ka kasabutan te Manama diye ki Nuwi
1 ✡ Hin 1:28.Impanalanginan te Manama si Nuwi wey ka me anak din wey migkahiyan, “Kabuhal kew eyew egpekeempet ka me kabuhalan niyu kayi te ampew te tane. 2 Egkengaaldek kaniyu ka langun ne mananap, me manuk-manuk, wey me ngalap. Sikaniyu ka egbuut kandan, 3 wey egpakakeen kew e kuntee due. Dengan, iyan ku re imbehey kaniyu ka me pinamula eyew egkeenen niyu. Piru kuntee, igbehey kud degma kaniyu seini se langun eyew egkeenen niyu. 4 ✡ Lib 7:26-27; 17:10-14; 19:26; Diy 12:16,23; 15:23.Piru kene kew en iya keen te mananap ne ware naawe ka langesa te peggimatey, tenged su ka langesa ka migligkatan te geyinawa. 5 Ke due etew ne eggimatey te etew, eglegparan ku sikandin. Ke due mananap ne eggimatey te etew, eglegparan ku degma sika. 6 ✡ Iks 20:13; Hin 1:26.Minsan hentew ka eggimatey, eggimatayan degma sikandin. Su inggimu te Manama ka etew ne nekeiling kandin. 7 ✡ Hin 1:28.Ne sikaniyu, kabuhal kew naa eyew egpekeempet kew kayi te ampew te tane.”
8 Ne migkahiyan te Manama ensi Nuwi wey ka me anak din, 9 “Kuntee, eggimu a te kasabutan duma keykew wey peendiye te langun ne kabuhalan niyu, 10 wey peendiye man‑e te langun ne eggeheyinawa—ka me manuk-manuk wey me mananap—ka langun ne nanlihawang te arka duma kaniyu. 11 Seini ka kasabutan ne eggimuwen ku diye te kaniyu: Kene kud e egguleen ka langun ne eggeheyinawa pinaahi te pegpasipuk te weyig. Kene kud eg-abayan te egdereet ka kalibutan pinaahi te pegsipuk te weyig.” 12 Ne migkahi e man‑e ka Manama, “Ka palinneu te kasabutan ta wey te langun ne mananap, wey peendiye te egginguma ne me kabuhalan niyu, 13 iyan ka baluntu ne egpalepawen ku diye te me gapun. Sika ka palinneu te kasabutan ku kaniyu te nangugpe te kalibutan. 14 Tagse eglibulungen ku ka me gapun diye te aw-awangan ne egkakite e ka baluntu, 15 egsumsumanen ku ka kasabutan ta wey peendiye te langun ne mananap ne kenad en iya egkahule ligkat te pegsipuk te weyig ka langun ne eggeheyinawa. 16 Emun ke eglepew e ka baluntu diye te me gapun, egpitawen ku seini wey egsumsumanen ku ka ware egtamanan ne kasabutan ta wey peendiye te langun ne eggeheyinawa kayi te ampew te tane. 17 Sika ka palinneu te inggimu ku ne kasabutan ta wey peendiye te langun ne eggeheyinawa kayi te ampew te tane.”
Ka me anak ni Nuwi
18 Seini ka me anak ni Nuwi ne nanlihawang diye te arka—si Sim, si Ham wey si Hapit. (Si Ham ka amey ni Kanaan.) 19 Seini se tatelu ne anak ni Nuwi, iyan migligkatan te langun ne etew kayi te ampew te tane.
20 Si Nuwi, talagbasukan wey sikandin ka an-anayan ne migpamula te paras. 21 Due timpu ne mig-inum sikandin te binu ne puun te paras, wey newubug e sikandin. Ne dutu, nakalipereng e sikandin diye te balungbalung din se migpalawas. 22 Ne nakita ni Ham ne amey ni Kanaan ka amey rin ne migpalawas. Sikan naa ka migkahiyan din e ka daruwa ne suled din diye te lihawangan. 23 Ne migkuwa si Sim wey si Hapit te manggad wey insampey ran diye te pamanayen dan. Ne mig-isues sikandan ka migseled diye te balungbalung ka migbunbun te amey ran. Warad iya sikandan miglilingey eyew kene dan egkakita ka amey ran ne migpalawas. 24 Nataman, te naalipaspasan e si Nuwi wey nanengnengan din e ka inggimu ni Ham ne igkalitan ne anak din, 25 migkahi e sikandin,
“Egkarilus si Kanaan. Egkeyimu sikandin ne uripen te me suled din.”
26 Ne migkahi man‑e sikandin,
“Sayeen ka Magbebaye ne Manama, ka Manama ni Sim!
Egkeyimu ne uripen ni Sim si Kanaan.
27 Egbuhalen te Manama si Hapit
wey eglemung ka me kabuhalan din te me kabuhalan ni Sim.
Ne egkeuripen degma ni Hapit si Kanaan.”
28 Pegkapenga te pegsipuk te weyig, neuyag pad si Nuwi te 350 ne leg‑un. 29 Ne migpatey sikandin te 950 e ka idad din.