48
Ka lalag te Manama meyitenged te me matig-Muwab
1 ✡ Isa 15:1–16:14; 25:10-12; Isi 25:8-11; Amu 2:1-3; Sup 2:8-11.Ne seini ka inlalag te Amana ne Maresen ne Magbebaye ne Manama te Israil meyitenged te Muwab:
“Mekeyid‑u-hid‑u ka keet-etawan te Nibu,
su nareetan e ka inged dan!
Naahew e ka Kiryataim,
wey nahuhus e ka kampu ran.
Ne egkengeyilawan e sikandan.
2 Kenad ne mabantug ka Muwab.
Naahew e te kuntere ka Hisbun
wey diye migplanu sikandan ne egdereetan ka nasud te Muwab.
Ne ka lungsud te Madmin,
eglusuran e te me kuntere wey egkahuhus iya seini.* Te Hibruwanen: egpape-peenengen ka; egtalukunan ka te kampilan.
3 Ne egmanguleyi ka me mahinged te Hurunaim ne egkahi,
‘Kahubut! Karereetan!’
4 “Nareetan e ka Muwab;
pammineha niyu ka me bate ne egmaninehew.
5 Pammineha niyu sikandan ka egmaninehew
taheed te egpanakereg peendiye te Luhit,
wey te egmatupang peendiye te Hurunaim.
Egkarineg ka laheng te egmanguleyi
tenged te karereetan.
6 Ne migkahi sikandan, ‘Pamallahuy kew, luwasa niyu ka me umul niyu!
Pamallahuy kew iling te leew ne asnu diye te disirtu!’
7 “He me matig-Muwab, migsalig kew te kanekal niyu wey te karatuan niyu,
piru egpandakepen kew lagkes ka diyus-diyus niyu ne si Kimus,
duma te me talagpanubad, wey te me upisyal rin.
8 Eggendiyaan iya te talagdereet ka tagse lungsud, ne ka langun ne lungsud egpakaneem-neem iya te karereetan.
Egkareetan iya ka napu wey mapatag.
9 Pangimu kew te lebenganan diye te Muwab
su mahaan e seini egkareeti.
Ne egkagguhus ka me siyudad din
wey warad eg-ugpe diye.
Sikeddiey se Magbebaye ne Manama ka miglalag kayi.”
10 (Egdilusen ka etew ne kene egtuman te igpeyimu te Magbebaye ne Manama! Egdilusen ka etew ne kene eggamit te kampilan din eyew eggimatey te me matig-Muwab!)
Nareetan e ka me siyudad te Muwab
11 Ne migkahi ka Magbebaye ne Manama, “Puun pad dengan meupiye e ka peg-ugpe te matig-Muwab wey ware narakep minsan ken‑u. Iling sikandan te binu ne ware weila wey ke innalin naa diye te lein ne tahuanan.† Iyan igpasabut te seini ne me lalag ka ware ken‑u nasamuk ka me matig-Muwab. Purisu ware nabalbalawi ka keemis kayi wey ka keemut.
12 “Purisu kuntee, eggingume e ka aldew ne egsuhu a te me etew ne eg-itis te Muwab iling te binu, wey eglupet te tahuanan kayi. 13 Ne igkeyilew e te me matig-Muwab ka diyus-diyus dan ne si Kimus, iling te pegkeyilew te me matig-Israil ki Bitil, ka diyus-diyus ne insalihan dan.
14 Ne sikaniyu se me matig-Muwab, egkahi kew ne bahani kew,
wey mabbulut ne me sundalu.
15 Eggingume e ka egdereet te Muwab wey te me siyudad kayi,
wey egpangimatayan ka mabbulut ne me kanakan kayi.
Sikeddiey ka Amana ne Maresen ne Manama, ka Manama te Israil ka miglalag kayi.
16 Eggingume e ka karereetan te Muwab,
wey egtigkew seini egginguma.
17 Sikaniyu se nakalingut ne me nasud, lungku kew para te Muwab
wey sikaniyu se langun ne nakataha te kabantug din.
Kahi kew, ‘Nataman e ka Muwab;
nahepu e ka tuked din ne palinneu te geem wey kabantug din.’
18 Ne sikaniyu se me mahinged te Dibun,
pamaneug kew e puun te mabantug ne ugpaan niyu
wey lumpang kew te alinepung.
Eglusud e ka egdereet te Muwab
wey egpangguhusen din e ka me kampu niyu.
19 Ne sikaniyu se me mahinged te Aruwir,
tetahari niyu due te ilis te dalan ka egpamallahuy,
wey insei niyu sikandan ke nekey ka neyitabu.
20 Ne egtabak sikandan, ‘Nareetan e wey neyilawan e ka Muwab.
Purisu lungku kew wey paninehew kew.
Ipanengneng niyu diye te ilis te Weyig ne Arnun ne nareetan e ka Muwab!’
21 “Ne egpanlegparan degma ka me siyudad ne diye te mapatag ne puntul te me bubungan te Hulun, Hasa, Mipaat, 22 Dibun, Nibu, Bit-Diblataim, 23 Kiryataim, Bit-Gamul, Bit-Miyun, 24 Kiriyut, wey Busra, wey ka langun ne siyudad te Muwab, marani ma wey se mariyu. 25 Nataman e ka geem te Muwab wey mahuye e seini. Sikeddiey se Magbebaye ne Manama ka miglalag kayi.”
Ka pegpeyilew te Muwab
26 Ne migkahi ka Magbebaye ne Manama, “Migsuman-suman ka Muwab ne labew pad sikandin keddiey. Purisu pewubuhi niyu sikandin taman te eglilid-lilid e sikandin te ileb din, wey egngingisiyan sikandin te me etew. 27 Keet-etawan te Muwab, sumsumana niyu ke immenu niyu te egdali-di ka me matig-Israil. In-iling niyu sikandan te nasapenan duma te me takawen.
28 “Sikaniyu se me matig-Muwab, engkeri niyu ka me lungsud niyu, wey diye kew e pangugpe te pahangen. Iling kew te selepati ne diye egsesalag te be‑be te sulung. 29 Me mapegpeggasal ka me matig-Muwab! Me hambuhen naan de iya sikandan wey kene sikandan egkateu ne egpariralem. 30 Sikeddiey se Magbebaye ne Manama, nakataha a te pegkaambuhen dan. Piru ware karuan due, wey kene egkaluhey ka me hinimuwan dan. 31 Purisu egsinehew a para te Muwab, wey para te me matig-Kir-Hiris. 32 Ne egsinehew a degma para te keet-etawan te Sibma labew pad du te pegsinehew ku te me matig-Hasir. He siyudad te Sibma, iling ka te paras ne nekeume e se sugpang diye te Namatey ne Dahat wey taman diye te Hasir. Piru kuntee, in-amin e dereeti ka me behas nu. 33 Ne warad e egmanggale-gale diye te malambeg ne tane diye te Muwab. Impeengked kud ka me etew ne egmangimu te binu, wey warad e egmanguleyi ne egkahale-gale ne egpangekeles te behas te paras. Ne warad binu ne egtulayas puun te kelesanan. Due egmanguleyi piru kene ne pegpanguleyi te kahale.
34 “Ne egkarineg ka kuleyian dan puun diye te Hisbun wey taman diye te Ili-Ali, wey Hahas. Egkarineg degma ka laheng dan puun te Suwar wey taman diye te Hurunaim, wey Iglat-Silisiya. Tenged su neetiyan e ka weyig minsan ka weyig te Nimrim. 35 Egpangimatayan ku ka me matig-Muwab ne egmanubad diye te bubungan ne panubaran, wey egmanutung te insinsu diye te me diyus-diyus dan. Sikeddiey se Magbebaye ne Manama ka miglalag kayi.
36 “Purisu amana a nalaggew tenged te me matig-Muwab wey te me matig-Kir-Hiris. Ka kalaggew ku egpekeiling te dahing te pulendag diye te impatayan tenged su warad e ka langun ne karatuan dan. 37 Migmatabulug sikandan langun wey migmanumpe, impamalian dan ka me belad dan, wey migsaluub sikandan te saku eyew te pegpapitew te peglungku dan. 38 Ne egmanguleyi ka me etew diye te me atep te me baley ran, wey diye te me plasa, tenged su indereetan kud ka Muwab iling te banga ne warad keilangana. 39 Nahuhus e ka Muwab! Pammineha niyu ka me mahinged ne egmanguleyi. Natamtamanan e neyilawi ka Muwab, egderali-dian sikandin, wey nenaaldek e ka langun ne nasud ne nakakita te neyitabu. Sikeddiey se Magbebaye ne Manama ka miglalag kayi.”
Kenad eg-alihu ka Muwab
40 Ne migpabulus ka Magbebaye ne Manama ne migkahi, “Pitawa niyu! Egpekeiling e te banug ka kuntere te Muwab ne egdawi kandin. 41 Egkaahew te me kuntere ka me siyudad wey me malig‑en wey matikang ne me baley te Muwab. Te sika ne timpu, egkengaaldek ka me sundalu te Muwab iling te pegkaaldek te malitan ne eg-anak. 42 Egkareetan iya ka Muwab tenged su migsukul sikandin keddiey wey kenad sikandin eg-ileen ne nasud. 43 Egtetahad te me matig-Muwab ka kaaldek, bitu, wey baled. Sikeddiey se Magbebaye ne Manama ka miglalag kayi. 44 Ne ka seeye se egpallahuy tenged te liyas, egkeulug diye te bitu. Ne ka seeye se egpakaawe puun te bitu, egsahad te baled. Eglegparan ku ka Muwab te timpu ne intahahe ku. Sikeddiey se Magbebaye ne Manama ka miglalag kayi. 45 Ne mekeyimmimenew seeye se eg-aput te Hisbun, ka migharian dengan ni Sihun, su egkasilaban e seini. Egkengasilaban e ka me bubungan ne egpangelhelesan te me matig-Muwab ne iyan de igkeupii ka egpakiggira. 46 Mekeyid‑u-hid‑u kew me matig-Muwab! Indereetan kew e se egmanimba te diyus-diyus ne si Kimus, wey impandakep e ka me anak niyu ne me lukes wey me malitan.
47 “Piru egginguma ka timpu ne iglibed ku red ka keupianan te Muwab. Sikeddiey se Magbebaye ne Manama ka miglalag kayi.” Sika ka inlalag te Manama meyitenged te Muwab.
✡48:1 Isa 15:1–16:14; 25:10-12; Isi 25:8-11; Amu 2:1-3; Sup 2:8-11.
*48:2 Te Hibruwanen: egpape-peenengen ka; egtalukunan ka te kampilan.
†48:11 Iyan igpasabut te seini ne me lalag ka ware ken‑u nasamuk ka me matig-Muwab.