Ka seini ne baseen, nallimud ne me lalag ne migpuun te Magbebaye ne Manama ne impahuhud ki prupita Hagiyu. Neyitabu seini te leg‑un ne 520 te ware pad neetew si Kristu. Te seeye ne timpu, nenekeuli e diye te Hirusalim ka keet-etawan te Manama ne impandakep diye te Babilunya. Piru minsan ke naluhey e nekeuli sikandan diye te Hirusalim, ware dan de due nabalbalawi te pegpasasindeg ka timplu. Purisu, ka langun ne tahu te seini ne baseen, migbanasal kandan te egbalbalawan iya igpasasindeg ka timplu. Ne migsaad ka Magbebaye ne Manama ne egmatubungen din wey egbehayan din te meupiya ne peg-ugpe seeye se keet-etawan ne nabalbalawan e se pegbebatasan wey migtuman e kandin.
Ka suhu te pegbalew-balew pegpasasindeg te timplu 1:1-15
Ka me guhuren ne egpakaliwang wey egkapallateng 2:1-23
1 1 [xr]Te an-anayan ne aldew te igkeen‑em ne bulan, te igkarangeb ne leg‑un te peghari ni Daryu te nasud te Pirsya, impahuhuran te Magbebaye ne Manama ki prupita Hagiyu si Sirubabil ne gubirnadur te Huda, wey si Huswi ne Labew ne Talagpanubad. Si Sirubabil anak ni Salatiil, wey si Huswi anak degma ni Hihusadak.
2 Seini ka inlalag te Amana ne Maresen ne Magbebaye diye ki Hagiyu ne miggenendue, “Migkahi ka me etew, ‘Ware pad migginguma ka timpu te pegbalew-balew te timplu te Manama.’ ” 3 Ne tenged due, impalalahan te Magbebaye ne Manama ki Hagiyu ka keet-etawan te miggenendue, 4 “Eggeram-geram kew naa egpangugpe te mateles ne me baley niyu taheed te nahuhus de due ka timplu? 5 Ne kuntee, sumsumana niyu ke nekey ka neumaan niyu! 6 Dakel ka impamula niyu piru deisek de ka nahaani niyu. Due egkakeen niyu piru kene kew re egkengabulung. Due eg-inumen niyu ne binu piru kene de egpakabawi kaniyu te egkammaraan. Nangukumbale kew piru egkengaagsilan kew red. Egmakaseleppi kew te pegtrabahu niyu piru mahaan de egkaamin. 7 Sikan naa, sumsumana niyu ke mania te neyitabu seini kaniyu. 8 Panakereg kew naa diye te me bubungan wey panggeed kew, wey balbalawi niyu ka timplu eyew egkahala a wey egkabantug.
9 “Egkeupian kew perem ne dakel ka egkahaani niyu piru deisek de ka nahaani niyu. Ne hengkayi te impanguyan niyud e seini diye te me baley niyu, mahaan de man‑e naamin. Su mania? Uya su imbalahad niyu ma ka timplu ku ne nahuhus, wey iyan niyu re egmangimuwen ka egmambebaley. 10 Tenged due, ware ku peurana wey warad iya minsan demmug naan de, wey ka tane, kenad e egkeuyahan te me pinamula. 11 Ne impahulabungan ku ka inged niyu eyew egkareetan ka me bubungan, ka me kamet, ka me parasan, ka me ulibu, wey ka langun ne egtubu diye te tane. Egkabaybayaran kew ka egpanggutasan minsan ka me ayam niyu, wey egkareetan degma ka langun ne impamula niyu.” Sika ka inlalag te Magbebaye ne Manama.
12 Ne si Sirubabil wey ka Labew ne Talagpanubad ne si Huswi, duma te langun ne nakalibed puun te pegkeuripen diye te Babilunya, migtuman te lalag te Magbebaye ne Manama ran. Naaldek sikandan te Magbebaye ne Manama, sikan naa ka intuman dan ka inlalag ni Hagiyu, ka prupita ne insuhu te Magbebaye. 13 Ne impangguhuran ni Hagiyu ka me etew te lalag te Magbebaye ne Manama ne miggenendue, “Igsaad ku ne egdumaan ku sikaniyu.” 14 Ne nabagget te Magbebaye ne Manama ne eggimu te timplu si Sirubabil ne gubirnadur te Huda, wey si Huswi ne Labew ne Talagpanubad, wey ka langun ne etew. Ne migbunsud e sikandan ka miggimu te timplu te Amana ne Maresen ne Magbebaye, ne Manama ran 15 te igkarangeb ne pulu wey hep‑at (24) ne aldew te igkeen‑em ne bulan. Igkarangeb ne leg‑un seeye te peghari ni Daryu.
2 1 Te igkarangeb ne pulu wey sabeka (21) ne aldew te igkapitu ne bulan, migpakiglalag e man‑e ka Magbebaye ne Manama ki prupita Hagiyu ne miggenendue, 2 “Kahii nu si Sirubabil ne gubirnadur te Huda, wey si Huswi ka Labew ne Talagpanubad, wey ka me etew: 3 [xr]Hentew kaniyu ka nakakita te katelesan dengan te seini ne timplu? Nekey naa kuntee ka pegtengteng niyu kayi? Hendue te warad e karuan kayi! 4 Ne kuntee, pakannekal kew! Sikeykew Sirubabil pakannekal ka, wey sikeykew degma Huswi ne Labew ne talagpanubad wey anak ni Hihusadak. Sikaniyu langun se mahinged te seini ne inged, pakannekal kew. Balbalawi niyu ka timplu su egdumaan ku sikaniyu,” kahi te Amana ne Maresen ne Magbebaye. 5 [xr]“Sika ka insaad ku kaniyu te peg-awe niyu diye te Ihiptu. Ne ka panisingan ku layun egduma kaniyu. Purisu kene kew kaaldek.
6 [xr]“Te kene egkaluhey, egwelwelen ku eg-abayi ka langit, ka kalibutan, ka dahat wey ka tane. 7 Egwelwelen ku ka langun ne nasud, wey egpanguyanen te me etew kayi te timplu ka langun ne karatuan dan, ne egkapenu te karatuan ka seini ne timplu. 8 Su sikeddiey ka kamuney te seleppi wey bulawan. 9 Ne subla pad ne tetelesi ka seini se iyam ne timplu du te an-anayan ne timplu. Ne egbehayan ku sikaniyu te keupianan kayi te seini ne inged.” Sika ka inlalag te Amana ne Maresen ne Magbebaye.
10 Te igkarangeb ne pulu wey hep‑at (24) ne aldew te igkasiyam ne bulan te igkarangeb ne leg‑un te peghari ni Daryu, migpakiglalag e man‑e ka Magbebaye ne Manama ki prupita Hagiyu ne miggenendue, 11 “Insei nu ka me talagpanubad ke nekey ka igkalalag dan meyitenged kayi: 12 Ke due etew ne eg-uyan te ngalap ne imbukusan te kumbale eyew igpanubad, egmatulus naa degma ka egkaragketan ne paan, sere, binu, mentika wey duma pad ne egkakeen?”
Ne migtabak ka me talagpanubad, “Kene.”
13 [xr]Ne mig-inse e man‑e si prupita Hagiyu, “Ke due etew ne migmalindit tenged su nakasamsam te minatey, wey miggen-gen degma sikandin te impanubad, egmalindit naa degma ka impanubad ne nahen-genan din?”
Ne migtabak ka me talagpanubad, “Uya, egmalindit degma.”
14 Ne migkahi si Hagiyu, “Purisu migkahi ka Magbebaye ne Manama te iling degma rue ka keet-etawan te Israil. Malindit sikandan diye te tangkaan din tenged te inggimu ran,[fn] sikan naa ka egmalindit degma ka langun ne impanubad dan diye te tangkaan te Magbebaye.
15 “Purisu sumsumana niyu ke nekey ka neyitabu kaniyu te ware niyu pad bunsuri te egbalew-balew ka timplu te Magbebaye ne Manama. 16 Te peggendiye niyu te kamet, mig-iman-iman kew ne egpakakuwa te hep‑at ne saku ne trigu, piru daruwa re ne saku ka nakuwa niyu. Te peggendiye niyu te impanahuan niyu te binu, mig-iman-iman kew ne egpakakuwa te lalimma ne pulu ne gelun, piru daruwa re ne pulu ne gelun ka nakuwa niyu. 17 Indereetan te Magbebaye ne Manama ka langun ne pinamula niyu wey impaketket din te me uled-uled wey impeuranan din te me apiyew ne iling kaddakel te me batu, piru ware kew mig-inniyug te me sale niyu. 18 Ne kuntee igkarangeb e ne pulu wey hep‑at (24) ne aldew te igkasiyam ne bulan, wey kuntee ne aldew neimpusan te peggimu ka pabunsuran te timplu. Ne pitawa niyu naa ke nekey ka egkeyitabu puun kuntee ne aldew. 19 Minsan warad nasame ne me trigu niyu, wey minsan warad behas te me paras niyu wey te me kayu ne egngaranan te iggira, te granada, wey te ulibu, piru puun kuntee egpanalanginan kew e Magbebaye ne Manama.”
20 Te seeye ded ne aldew, migpakiglalag e man‑e ka Magbebaye ne Manama ki prupita Hagiyu ne miggenendue, 21 “Kahii nu si Sirubabil ka gubirnadur te Huda ne egwelwelen ku ka langit wey ka tane, 22 wey egdereetan ku ka me migharian, lagkes ka me Hari wey eg-aween ku ka geem dan. Egpamalintuaren ku ka me karwahi ran wey ka migmanguntud kayi. Egpamatey ka me kudde wey egmeun-unayey egmeyimmimatayey ka migmangudde. 23 Te seeye ne timpu, igteil ku sikeykew Sirubabil se suluhuanen ku eyew egpangulu te keet-etawan ku su in-alam ku sikeykew.” Sika ka inlalag te Amana ne Maresen ne Magbebaye.