Ka seini ne baseen, insulatan te guhuren meyitenged te karereetan te Ninibi, ka iney ne siyudad te Asirya ne kuntere dengan te Israil. Nasulat seini te me elat-elat te 663 wey 612 ne leg‑un te ware pad neetew ka Kristu. Nahale si prupita Nahum te nareetan e ka Ninibi, su sika ka palinneu ne eglegparan iya te Magbebaye ne Manama ka me makasesale. Minsan ka me etew, migpalintutuu degma ne inlegparan te Manama ka Ninibi su mabbulut ma wey me hambuhen ka me mahinged te sika ne siyudad.
Ka peglegpad te Magbebaye te Ninibi 1:1-15
Ka pegkahuhus te Ninibi 2:1–3:19
1 1 [xr]Seini ka lalag te Magbebaye ne Manama meyitenged te Ninibi; impanengneng din seini ki prupita Nahum ne matig-Ilkus.
2 Talikuren ka Magbebaye ne Manama
wey mahaan sikandin egsuli te me kuntere din,
wey kene sikandin egpeeneng-eneng ka egpakig-ehet kandan.
Subla sikandin ne lelangeten
wey mahaan egsuli kandan.
3 Malehet iya ne kene ne uupulen ka Magbebaye,
piru amana ne maresen sikandin
wey egpanlegparan din iya ka me makasesale.
Egpangalamag ke eglihad sikandin wey egbebalisusu,
wey ka me gapun ne egdiekan din, egpekeiling de te alinepung.
4 Egsaparan din ka dahat wey egkeetiyan e;
eg-etiyan din ka langun ne weyig.
Egkengallanes ka me pinamula diye te Basan wey diye bubungan te Karmil,
wey egkengallanes degma ka me bulak diye te Libanun.
5 Egkawelwel ka me bubungan ke eglepew sikandin,
wey egkallunew ka me labuntud.
Egkawelwel ka kalibutan,
wey egpangelkelen e te liyas ka langun ne nangugpe te inged.
6 Hentew ka kene egkamenu ke egkalangetan e sikandin?
Ware iya egkeuyag ke egpangebel-ebel e ka langet din.
Egpekeiling te hapuy ne egkanlabkanlab ka langet din,
wey egkengallupet ka me batu diye te tangkaan din.
7 Meupiya ka Magbebaye ne Manama;
sikandin ka maresen ne aputanan te timpu te keyirapan,
wey egtangguwen[fn] din seeye se eg-aput kandin.
8 Egpekeiling sikandin te mangune-kune ne baggiyu
ne eggule te langun ne egkuntere kandin,
wey egpanlupuhen din ka me kuntere din taman te egkareetan[fn] sikandan.
9 Purisu ke eglelalis sikandan ne egdereet te Magbebaye,
egbalabahan din iya sika eyew kene egpakabulus,
wey kenad egkaabayan pad man‑e ka samuk.
10 Minsan iling sikandan te nekeglambid ne sapinit, wey iling te etew ne egkewubug,
egdereetan ded iya sikandan iling te nahangu ne lahami ne egsilaban.
11 Due migpuun te keykew, Ninibi, ka etew ne egpanambag te ware karuan,
wey eglelalis ne egdereet te Magbebaye.
12 Seini ka inlalag te Magbebaye,
“Minsan ke maresen wey masulug sikandan,
egguleen ku iya sikandan egpangimatayi.
Minsan impeyirapan ku ka keet-etawan ku,
piru kene kud e sikandan eg-abayan pad egpeyirapi.
13 Su igpaawe kud sikaniyu te me matig-Asirya ne mig-uripen kaniyu,[fn]
eyew duen e kaligwangan niyu.”
14 Seini ka inlalag te Magbebaye ne Manama diye te me matig-Asirya:
“Egkaawaan kew e te me kabuhalan ne iyan perem eg-uyan te ngaran niyu.
Egdereetan ku ka immangimu niyu ne me larawan ne intahu niyu diye te me panubaran niyu.
Eg-andamen kud e ka eglebengan kaniyu
su likes kew ne eggimatayan.”
15 [xr]Tengteng kew! Diye migpammubung te me bubungan
ka insuhu ne egpepangguhuren te meupiya ne panugtulen ne duen e keupianan niyu!
Hilutu kew te me sahakeen niyu me matig-Huda,
wey tumana niyu ka insaad niyu.
Kenad egpakalusud kaniyu ka maddeet ne me etew,
su naamin-amin e sikandan nahule.
2 1 Me matig-Ninibi,
eglusuran kew e te me kuntere niyu ne egmegsuwey-suwey kaniyu.
Tamengi niyu ka me alad niyu, wey bantayi niyu ka me dalan!
Pangandam kew te gira!
Libulunga niyud ka langun ne sundalu[fn] niyu.
2 Su iglibed ded te Magbebaye ne Manama ka kabantug ni Hakub ne kabantug te Israil,
minsan ke indereetan niyud sikandan iling te paras ne indereetan ka me sugpang.
3 Mallalab ka me kalasag te me kuntere niyu ne me sundalu,
wey mallalab degma ka insaluub dan.
Egpangilak-ilak ka me karwahi ran ke egkapane te layag te aldew,
wey egkengaana-ane en iya ne egligkat ka me kudde dan.[fn]
4 Miglakiris de ka me karwahi ran diye te deralanen;
egmanaltalibeng sikandan diye te me plasa.
Egpamalusiksik ka me karwahi ran iling te sulu,
wey memeiyal sikandan ne egmanweil-weil iling te kilat.
5 Impeumew te Hari ka me pangulu te me sundalu
wey nenakarugsu sikandan ka eg-iyal-iyal.
Migsegseg sikandan diye te alad ne batu ne matikang wey makepal,
wey intangen dan ka ig-akeb te alad eyew kene egkabutbutan te me kuntere ka alad dan.
6 Egkengallukatan ka gumawan ne in-elet te weyig,
wey egkalened ka palasyu niyu.
7 Ingkerew e ne egdakepen kew,[fn]
wey eg-uyanen diye te mariyu.
Egmandeg-uy ka me suluhuanen ne me malitan,
wey egmandabiyen dan ka me kumeng dan te eglungku.
Egmanlungku sikandan iling te me selepati.
8 Egpamallahuy ka me mahinged te Ninibi,
iling te linew ne egkaluwangan.
Ne egmanguleyi ka me duma ran ne egsapad kandan,
“Sanggel kew! Libed kew kayi!”
Piru kenad iya sikandan egmanlinga-linga.
9 Pangahawa niyu ka me pelata,
wey pangua niyu ka me bulawan diye te Ninibi!
Napenu te karatuan ka sika ne inged,
wey susuluhi ka mahal ne me kasangkapan dan.
10 Nahuhus e ka Ninibi
wey in-engkeran e seini.
Nenaaldek ka me mahinged;
migmahuye ka me lawa ran,
wey nangelkel ka me buel ran,
wey migmemakalawag e sikandan!
11 Hendei naan e ka Ninibi ne nekeiling te sulung ne ugpaan te me liyun;
ka inged ne egpekeiling te pakeenanan te me anak te liyun?
Hendei naan e ka siyudad ne nekeiling te dugmun te me liyun,
wey warad iya egpakabangkew kandan?
12 Egpamindasen te liyun ka dinawi rin,
wey igpangatul rin te me anak din wey te me beyan.
Eggipenuen din ka sulung te dinawi rin,
wey egsekel ka dugmun din te me sapu ne impamindas-bindas din.
13 Ne migkahi ka Amana ne Maresen ne Magbebaye, “Pammineg kew matig-Ninibi! Egpakig-ehet a kaniyu! Egpanilaban ku ka me karwahi niyu, wey egpamatey ka me sundalu diye te gira.[fn] Egkuen ku ka langun ne karatuan ne in-ahew niyu diye te duma.[fn] Kene kew e egpakasuhu te me suluhuanen niyu eyew egginalat wey egbanasal te duma ne me nasud.”[fn]
3 1 Mekeyid‑u-hid‑u ka siyudad ne ugpaan te me mangngimatey.
Neelin ne ubaten ka me mahinged, me takawen,
wey eggelebek egpangahew te duma.
2 Pammineha niyu ka masilatipak ne me lampes,
wey ka mahulub ne me liggid te me karwahi ne egmandatul-datul,
wey ka egmandabek-dabek ne me kudde ne egmanlungkesu.
3 Miglusud e ka me sundalu ne migmangudde,
egmangilak-ilak ka me kampilan wey me kelaab dan.
Masulug ka migpatey wey miglatambu ka me minatey;
egkasaligkat e sikandan te lawa te me minatey ne nakabahed minsan hendei.
4 Ne neyitabu seini se langun diye te Ninibi tenged su iling sikandin te malitan ne egpamelegye te lawa,
talagtintal sikandin wey due talihubay rin.
Sikan naa ka naakalan ka duma ne nasud ne egpasakup kandin.
5 Ne ingkahiyan te Amana ne Maresen ne Magbebaye ka me matig-Ninibi,
“Pammineg kew. Egpakig-ehet a kaniyu!
Egpeyilawan ku sikaniyu diye te me nasud; egpekeiling kew te malitan ne eglangisan ku
eyew egkamelmelehan te duma ne me migharian ka mekeyilew-hilew ne lawa niyu.
6 Egpandegpakan ku sikaniyu te mallindit ne me lapek palinneu ne egle-leihen ku sikaniyu,
wey igpapitew ku sikaniyu te me etew eyew egdali-dian kew nikandan.
7 Ne egpariyu ka langun ne egpakakita kaniyu wey egkahi sikandan,
‘Nahuhus e ka Ninibi.
Hentew naan e ka egdamag kandin?
Hendei kid naa egpakakita te egliwang kandin?’ ”
8 Ninibi, meupiya ke naan pad te inged ne Tibis,
ka siyudad ne marani te Weyig ne Nilu?
Nalingutan sikandin te weyig ne iyan egpekeelet te me kuntere din, wey mahaalad din.
9 Ne ware katamanan te karesen te Tibis su iyan din kanekal ka Itiyupiya[fn] wey ka Ihiptu.
Ne egpangabang degma kandin ka Put wey ka Libya.
10 Piru narakep ded ka me matig-Tibis wey neuyan ded sikandan,
wey impamindas-bindas diye te deralanen ka me anak dan ne dereisek pad.
Impangiketan te keddina ka me talahuren dan ne me etew,
wey migpintut-pintut ka me kuntere dan te pegbaad-baad kandan eyew eg-uripenen.
11 Sikaniyu degma se me matig-Ninibi, egsahap kew degma;
egpekeiling kew te egkewubug ne egpakatilistilis.
Egpamallahuy kew ke eglusuran kew e te me kuntere niyu;
egpamitew kew te inged ne eggelesan niyu.
12 Ka langun ne malig‑en wey matikang ne me baley niyu,
egpekeiling te kayu ne iggira ne sikan pad neyinuhi se me behas.
Ne emun ke egwelwelen ka kayu,
egkengeulug ka me behas wey egpakatuen diye te be‑be te etew ne egkeupian ne egkeen.
13 Tengteng kew, me luyeg ka me sundalu niyu iling te me malitan.
Egkatutung ka me pagul te gumawan te siyudad niyu,
sikan naa ka mahaan de egpakaseled ka me kuntere niyu.
14 Pangandam kew te peglusud te me kuntere niyu!
Sakug kew e te weyig!
Hireseni niyud ka me matikang wey makepal ne alad niyu ne batu!
15 Piru minsan nekey ka eggimuwen niyu, egkengasilaban kew red iya
wey egpangimatayan kew pinaahi te kampilan.
Egkahule kew iling te pinamula ne egdeesan te me talangas.
Kabuhal kew iling kasulug te me talangas;
pamasulug kew iling te me palahe!
16 Intimulan niyu ka me nigusyanti due te kaniyu,
wey masulug pad sikandan du te me bituen diye te langit.
Piru egkengaawe ded sikandan
iling te me talangas ne eglayang ded ke egkaamin dan e te egkeen ka me pinamula.
17 Egpekeiling ka me talagbantey niyu te masulug ne me palahe.
Egpekeiling ka me upisyal niyu te matangen ne me talangas
ne nekeepus de iya te matikang wey makepal ne alad niyu ne batu te tingmaagsil.
Piru eglayang sikandan ke egsile e ka aldew
wey ware egpakataha ke hendeid e sikandan.
18 He Hari te Asirya, egkahule[fn] ka me talagbantey nu.
Masihuntelas diye te me bubungan ka keet-etawan nu,
wey warad iya eglibulung kandan.
19 Egpekeiling ka te etew ne napaddel
wey kenad e egkeulian se pali.
Egmakapegtagpi te me belad dan ka langun ne egpakarineg te insahapan nu.
Su neelin naan de iya ne mareet ka eggimuwen nu te me etew
wey langun dan iya ne nakaheram te kabulut nu.
1:7 Te Hibruwanen: neila.
1:8 Te Hibruwanen: peendiye te marusilem.
1:13 Te Hibruwanen: eggepuen ku ka yuggu rin kaniyu.
2:1 Te Hibruwanen: kanekal.
2:3 Te Hibruwanen: inwelewes dan ka me deldeg dan ne inggimu puun te kayu ne sipri.
2:7 Te Hibruwanen: nateil e ne egluungan. Migkahi ka duma ne iyan igpasabut kayi ka Rayna te Ninibi wey ke ngaran naa te diyus-diyus ne si Istar.
2:13 Te Hibruwanen: eg-abelengen te kampilan ka anak nu ne me liyun.
2:13 Te Hibruwanen: egtamperen ku ka indawi niyu puun te kalibutan.
2:13 Te Hibruwanen: kenad egkarineg ka laheng te me talagpangguhud niyu.
3:9 Te Hibruwanen: Kus.
3:18 Te Hibruwanen: nakalipereng.