Amus 1

Ka baseen ni Amus

Amus

Igpewun‑a

Si Amus sabeka ne talagtameng te me karniru te ware pad sikandin neyimu ne prupita. Diye sikandin ne mahinged te Tikuwa ne sakup te prubinsiya te Huda, piru insuhu sikandin te Manama ne egpeendiyeen te Bitil diye Israil eyew egpawaliyen diye. Ka Israil diye te ampew te Huda. Neyitabu seini te me walu ne gatus (800) ne leg‑un te ware pad neetew si Kristu. Impanengneng din ka me etew ne egdusaan te Manama ka Sirya, Pilistiya, Pinisiya, Idum, Amun, Muwab, minsan ka Huda. Te seeye ne timpu, migmatubung ka me etew wey ware gubut dan te duma ne me nasud, wey migmaluag ka tane ne nasakup dan. Piru nakita ni Amus ne iyan de migmatubung ka me meyaman su indeeg-deeg dan ka ware egkengeyimu wey kene ne eleg ka peggukum kandan diye te hukumanan. Ware dan tumana ka balaud te Manama, wey ware dan tumana ka me suhu din. Seeye naa ka ware mig-ulung-ulung si Amus ne migpangguhud ne eglegparan iya te Magbebaye ne Manama ka inged dan. Imbanasalan din sikandan ne eg-ikulen ka eleg ne peggukum diye te hukumanan, su kema ke egkeyid‑u red ka Manama te nenasame ne me etew te inged dan (5:15).

Ka nenasulat te seini ne baseen

Ka peglegpad te me nasud ne marani te Israil 1:1–2:5

Ka peglegpad te Israil 2:6–6:14

Ka lalimma ne impakita 7:1–9:15

1 ✡Seini ka ingkahi ni Amus ne meyitenged te Israil. Sabeka sikandin ne talagtameng te me karniru diye te lungsud te Tikuwa. Impataha kandin te Magbebaye ne Manama ka seini ne lalag te me daruwa ne leg‑un te ware pad miglilinug. Timpu seeye te iyan Hari te Huda si Usiyas, wey iyan Hari te Israil si Hirubuwam ne anak ni Huwas.

2 ✡Migkahi sikandin,

“Impasengku-sengku te Magbebaye ne Manama ka laheng din puun te Siyun,*

wey impabawes din seini puun te Hirusalim.

Ne naggangu† ka me panabtaban,

wey ka me hilamunen diye te Bubungan te Karmil.”

Ka peglegpad te marani ne inged te Israil

3 ✡Ne seini ka ingkahi te Magbebaye ne Manama, “Layun‡ egpakasale ka me matig-Damasku, sikan naa, eglegparan ku iya sikandan. Imbaybayaran dan amana ka nangugpe te Gilyad.§ 4 Sikan naa, egsilaban ku ka palasyu ni Hari Hasail wey egtutungen ku ka malig‑en wey matikang ne baley ni Hari Binhadad. 5 Egguhusen ku ka pagul te gumawan te Damasku wey egdereetan ku ka mahinged te bangalug ne egngaranan te Abin, wey ka pangulu* te Bit-idin. Ne ka matig-Sirya egpandakepen wey egpanguyanen diye te Kir.” Sika ka ingkahi te Magbebaye ne Manama.

Ka peglegpad te Pilistiya

6 ✡Ne seini ka ingkahi te Magbebaye ne Manama, “Layun† egpakasale ka me matig-Gasa. Sikan naa, eglegparan ku iya sikandan, su impandakep wey impanguyan dan ka senge-ingeran ne me etew wey imbelegye dan diye te inged ne Idum. 7 Sikan naa, egsilaban ku ka matikang wey makepal ne alad te Gasa wey egtutungen ku ka me palasyu dutu. 8 Egdereetan ku ka Hari te Asdud, wey ka pangulu‡ te Askalun. Eglegparan ku ka Ikrun wey egpamatey degma ka nenasame ne Pilistihanen.” Sika ka ingkahi te Magbebaye ne Manama.

Ka peglegpad te Tiru

9 ✡Ne seini ka ingkahi te Magbebaye ne Manama, “Layun§ egpakasale ka me matig-Tiru. Sikan naa, eglegparan ku iya sikandan su ware dan tumana ka kasabutan dan ne egpeup-upianey se tagtahasuled, su impandakep dan ka senge-ingeran ne me etew wey imbelegye diye te inged ne Idum. 10 Sikan naa, egsilaban ku ka matikang wey makepal ne alad te Tiru, wey egtutungen ka me palasyu dutu.”

Ka peglegpad te inged ne Idum

11 ✡Ne seini ka ingkahi te Magbebaye ne Manama, “Layun* egpakasale ka me matig-Idum. Sikan naa, eglegparan ku iya sikandan tenged te impanlupug dan ka me suled dan ne Israilita wey warad iya hid‑u ran te egpangimatey kandan. Layun de sikandan egkabelu wey kene egkataman ka langet dan. 12 Sikan naa, egsilaban ku ka Timan, wey egtutungen ku ka me palasyu te Busra.”

Ka peglegpad te Amun

13 ✡Ne seini ka ingkahi te Magbebaye ne Manama, “Layun† egpakasale ka me matig-Amun. Sikan naa, eglegparan ku sikandan su egkaalamlam sikandan te tane. Ne eyew egmaluag de iya ka tane dan, impangebuan dan minsan ka egkengaberes ne me malitan diye te Gilyad. 14 Sikan naa, egsilaban ku ka matikang wey makepal ne alad te Raba, wey egtutungen ku ka me palasyu dutu. Egpanguleyi sikandan ka egmabunbunuey ne egpekeiling e te makeseg ne kalamag ne egbebalisusu. 15 Ne egkaddakep wey egpanguyanen ka Hari wey ka me pangulu ran.” Sika ka ingkahi te Magbebaye ne Manama.

Amus
<
1
>

✡1:1 2Har 15:1-7; 2Kru 26:1-23; 2Har 14:23-29.

✡1:2 Huwil 3:16.

*1:2 Ka Siyun wey Hirusalim, sabeka re ne inged.

†1:2 Ka dengan de ne innalin ne me Bibliya, kene ne “nenaggangu” su “miglungku” ka inggamit.

✡1:3 Isa 17:1-3; Hir 49:23-27; Sak 9:1.

‡1:3 Te Hibruwanen: katatelu wey keep‑at.

§1:3 Te Hibruwanen: Inlupet dan sikandan te putew ne igdiek te trigu.

*1:5 Te Hibruwanen: miggen-gen te tuked.

✡1:6 Isa 14:29-31; Hir 47:1-7; Isi 25:15-17; Huwil 3:4-8; Sup 2:4-7; Sak 9:5-7.

†1:6 Te Hibruwanen: katatelu wey keep‑at.

‡1:8 Te Hibruwanen: miggen-gen te tuked.

✡1:9 Isa 23:1-18; Isi 26:1–28:19; Huwil 3:4-8; Sak 9:1-4; Mat 11:21-22; Luk 10:13-14.

§1:9 Te Hibruwanen: katatelu wey keep‑at.

✡1:11 Isa 34:5-17; 63:1-6; Hir 49:7-22; Isi 25:12-14; 35:1-15; Ubd 1-14; Mal 1:2-5.

*1:11 Te Hibruwanen: katatelu wey keep‑at.

✡1:13 Hir 49:1-6; Isi 21:28-32; 25:1-7; Sup 2:8-11.

†1:13 Te Hibruwanen: katatelu wey keep‑at.