UHB PSA Chapter 12

◄ PSA 12 ► ║ ═ ©

12 1 לַ⁠מְנַצֵּ֥חַ עַֽל־הַ⁠שְּׁמִינִ֗ית מִזְמ֥וֹר לְ⁠דָוִֽד׃

1 2 הוֹשִׁ֣יעָ⁠ה יְ֭הוָה כִּי־גָמַ֣ר חָסִ֑יד כִּי־פַ֥סּוּ אֱ֝מוּנִ֗ים מִ⁠בְּנֵ֥י אָדָֽם׃ 2 3 שָׁ֤וְא ׀ יְֽדַבְּרוּ֮ אִ֤ישׁ אֶת־רֵ֫עֵ֥⁠הוּ שְׂפַ֥ת חֲלָק֑וֹת בְּ⁠לֵ֖ב וָ⁠לֵ֣ב יְדַבֵּֽרוּ׃ 3 4 יַכְרֵ֣ת יְ֭הוָה כָּל־שִׂפְתֵ֣י חֲלָק֑וֹת לָ֝שׁ֗וֹן מְדַבֶּ֥רֶת גְּדֹלֽוֹת׃ 4 5 אֲשֶׁ֤ר אָֽמְר֨וּ ׀ לִ⁠לְשֹׁנֵ֣⁠נוּ נַ֭גְבִּיר שְׂפָתֵ֣י⁠נוּ אִתָּ֑⁠נוּ מִ֖י אָד֣וֹן לָֽ⁠נוּ׃ 5 6 מִ⁠שֹּׁ֥ד עֲנִיִּים֮ מֵ⁠אַנְקַ֪ת אֶבְי֫וֹנִ֥ים עַתָּ֣ה אָ֭קוּם יֹאמַ֣ר יְהוָ֑ה אָשִׁ֥ית בְּ֝⁠יֵ֗שַׁע יָפִ֥יחַֽ לֽ⁠וֹ׃ 6 7 אִֽמֲר֣וֹת יְהוָה֮ אֲמָר֪וֹת טְהֹ֫ר֥וֹת כֶּ֣סֶף צָ֭רוּף בַּ⁠עֲלִ֣יל לָ⁠אָ֑רֶץ מְ֝זֻקָּ֗ק שִׁבְעָתָֽיִם׃ 7 8 אַתָּֽה־יְהוָ֥ה תִּשְׁמְרֵ֑⁠ם תִּצְּרֶ֓⁠נּוּ ׀ מִן־הַ⁠דּ֖וֹר ז֣וּ לְ⁠עוֹלָֽם׃ 8 9 סָבִ֗יב רְשָׁעִ֥ים יִתְהַלָּכ֑וּ⁠ן כְּ⁠רֻ֥ם זֻ֝לּ֗וּת לִ⁠בְנֵ֥י אָדָֽם׃