UHB PSA Chapter 74

◄ PSA 74 ► ║ ═ ©

74 מַשְׂכִּ֗יל לְ⁠אָ֫סָ֥ף לָ⁠מָ֣ה אֱ֭לֹהִים זָנַ֣חְתָּ לָ⁠נֶ֑צַח יֶעְשַׁ֥ן אַ֝פְּ⁠ךָ֗ בְּ⁠צֹ֣אן מַרְעִיתֶֽ⁠ךָ׃ 2 זְכֹ֤ר עֲדָתְ⁠ךָ֨ ׀ קָ֘נִ֤יתָ קֶּ֗דֶם גָּ֭אַלְתָּ שֵׁ֣בֶט נַחֲלָתֶ֑⁠ךָ הַר־צִ֝יּ֗וֹן זֶ֤ה ׀ שָׁכַ֬נְתָּ בּֽ⁠וֹ׃ 3 הָרִ֣ימָ⁠ה פְ֭עָמֶי⁠ךָ לְ⁠מַשֻּׁא֣וֹת נֶ֑צַח כָּל־הֵרַ֖ע אוֹיֵ֣ב בַּ⁠קֹּֽדֶשׁ׃ 4 שָׁאֲג֣וּ צֹ֭רְרֶי⁠ךָ בְּ⁠קֶ֣רֶב מוֹעֲדֶ֑⁠ךָ שָׂ֖מוּ אוֹתֹתָ֣⁠ם אֹתֽוֹת׃ 5 יִ֭וָּדַע כְּ⁠מֵבִ֣יא לְ⁠מָ֑עְלָ⁠ה בִּֽ⁠סֲבָךְ־עֵ֝֗ץ קַרְדֻּמּֽוֹת׃ 6 וְ֭עַתָּה [fn] פִּתּוּחֶ֣י⁠הָ יָּ֑חַד בְּ⁠כַשִּׁ֥יל וְ֝⁠כֵֽילַפֹּ֗ת יַהֲלֹמֽוּ⁠ן׃ 7 שִׁלְח֣וּ בָ֭⁠אֵשׁ מִקְדָּשֶׁ֑⁠ךָ לָ֝⁠אָ֗רֶץ חִלְּל֥וּ מִֽשְׁכַּן־שְׁמֶֽ⁠ךָ׃ 8 אָמְר֣וּ בְ֭⁠לִבָּ⁠ם נִינָ֣⁠ם יָ֑חַד שָׂרְפ֖וּ כָל־מוֹעֲדֵי־אֵ֣ל בָּ⁠אָֽרֶץ׃ 9 אֽוֹתֹתֵ֗י⁠נוּ לֹ֥א רָ֫אִ֥ינוּ אֵֽין־ע֥וֹד נָבִ֑יא וְ⁠לֹֽא־אִ֝תָּ֗⁠נוּ יֹדֵ֥עַ עַד־מָֽה׃ 10 עַד־מָתַ֣י אֱ֭לֹהִים יְחָ֣רֶף צָ֑ר יְנָ֘אֵ֤ץ אוֹיֵ֖ב שִׁמְ⁠ךָ֣ לָ⁠נֶֽצַח׃ 11 לָ֤⁠מָּה תָשִׁ֣יב יָ֭דְ⁠ךָ וִֽ⁠ימִינֶ֑⁠ךָ מִ⁠קֶּ֖רֶב חֵֽיקְךָ֣ [fn] כַלֵּֽה׃ 12 וֵ֭⁠אלֹהִים מַלְכִּ֣⁠י מִ⁠קֶּ֑דֶם פֹּעֵ֥ל יְ֝שׁוּע֗וֹת בְּ⁠קֶ֣רֶב הָ⁠אָֽרֶץ׃ 13 אַתָּ֤ה פוֹרַ֣רְתָּ בְ⁠עָזְּ⁠ךָ֣ יָ֑ם שִׁבַּ֖רְתָּ רָאשֵׁ֥י תַ֝נִּינִ֗ים עַל־הַ⁠מָּֽיִם׃ 14 אַתָּ֣ה רִ֭צַּצְתָּ רָאשֵׁ֣י לִוְיָתָ֑ן תִּתְּנֶ֥⁠נּוּ מַ֝אֲכָ֗ל לְ⁠עָ֣ם לְ⁠צִיִּֽים׃ 15 אַתָּ֣ה בָ֭קַעְתָּ מַעְיָ֣ן וָ⁠נָ֑חַל אַתָּ֥ה ה֝וֹבַ֗שְׁתָּ נַהֲר֥וֹת אֵיתָֽן׃ 16 לְ⁠ךָ֣ י֭וֹם אַף־לְ⁠ךָ֥ לָ֑יְלָה אַתָּ֥ה הֲ֝כִינ֗וֹתָ מָא֥וֹר וָ⁠שָֽׁמֶשׁ׃ 17 אַתָּ֣ה הִ֭צַּבְתָּ כָּל־גְּבוּל֣וֹת אָ֑רֶץ קַ֥יִץ וָ֝⁠חֹ֗רֶף אַתָּ֥ה יְצַרְתָּ⁠ם׃ 18 זְכָר־זֹ֗את א֭וֹיֵב חֵרֵ֣ף ׀ יְהוָ֑ה וְ⁠עַ֥ם נָ֝בָ֗ל נִֽאֲצ֥וּ שְׁמֶֽ⁠ךָ׃ 19 אַל־תִּתֵּ֣ן לְ֭⁠חַיַּת נֶ֣פֶשׁ תּוֹרֶ֑⁠ךָ חַיַּ֥ת עֲ֝נִיֶּ֗י⁠ךָ אַל־תִּשְׁכַּ֥ח לָ⁠נֶֽצַח׃ 20 הַבֵּ֥ט לַ⁠בְּרִ֑ית כִּ֥י מָלְא֥וּ מַחֲשַׁכֵּי־אֶ֝֗רֶץ נְא֣וֹת חָמָֽס׃ 21 אַל־יָשֹׁ֣ב דַּ֣ךְ נִכְלָ֑ם עָנִ֥י וְ֝⁠אֶבְי֗וֹן יְֽהַלְל֥וּ שְׁמֶֽ⁠ךָ׃ 22 קוּמָ֣⁠ה אֱ֭לֹהִים רִיבָ֣⁠ה רִיבֶ֑⁠ךָ זְכֹ֥ר חֶרְפָּתְ⁠ךָ֥ מִנִּי־נָ֝בָ֗ל כָּל־הַ⁠יּֽוֹם׃ 23 אַל־תִּ֭שְׁכַּח ק֣וֹל צֹרְרֶ֑י⁠ךָ שְׁא֥וֹן קָ֝מֶ֗י⁠ךָ עֹלֶ֥ה תָמִֽיד׃

K ו⁠עת

K חוק⁠ך