UHB PSA Chapter 81

◄ PSA 81 ► ║ ═ ©

81 1 לַ⁠מְנַצֵּ֬חַ ׀ עַֽל־הַ⁠גִּתִּ֬ית לְ⁠אָסָֽף׃

1 2 הַ֭רְנִינוּ לֵ⁠אלֹהִ֣ים עוּזֵּ֑⁠נוּ הָ֝רִ֗יעוּ לֵ⁠אלֹהֵ֥י יַעֲקֹֽב׃ 2 3 שְֽׂאוּ־זִ֭מְרָה וּ⁠תְנוּ־תֹ֑ף כִּנּ֖וֹר נָעִ֣ים עִם־נָֽבֶל׃ 3 4 תִּקְע֣וּ בַ⁠חֹ֣דֶשׁ שׁוֹפָ֑ר בַּ֝⁠כֵּ֗סֶה לְ⁠י֣וֹם חַגֵּֽ⁠נוּ׃ 4 5 כִּ֤י חֹ֣ק לְ⁠יִשְׂרָאֵ֣ל ה֑וּא מִ֝שְׁפָּ֗ט לֵ⁠אלֹהֵ֥י יַעֲקֹֽב׃ 5 6 עֵ֤דוּת ׀ בִּֽ⁠יה֘וֹסֵ֤ף שָׂמ֗⁠וֹ בְּ֭⁠צֵאת⁠וֹ עַל־אֶ֣רֶץ מִצְרָ֑יִם שְׂפַ֖ת לֹא־יָדַ֣עְתִּי אֶשְׁמָֽע׃ 6 7 הֲסִיר֣וֹתִי מִ⁠סֵּ֣בֶל שִׁכְמ֑⁠וֹ כַּ֝פָּ֗י⁠ו מִ⁠דּ֥וּד תַּעֲבֹֽרְנָה׃ 7 8 בַּ⁠צָּרָ֥ה קָרָ֗אתָ וָ⁠אֲחַ֫לְּצֶ֥⁠ךָּ אֶ֭עֶנְ⁠ךָ בְּ⁠סֵ֣תֶר רַ֑עַם אֶבְחָֽנְ⁠ךָ֨ עַל־מֵ֖י מְרִיבָ֣ה סֶֽלָה׃ 8 9 שְׁמַ֣ע עַ֭מִּ⁠י וְ⁠אָעִ֣ידָה בָּ֑⁠ךְ יִ֝שְׂרָאֵ֗ל אִם־תִּֽשְׁמַֽע־לִֽ⁠י׃ 9 10 לֹֽא־יִהְיֶ֣ה בְ֭⁠ךָ אֵ֣ל זָ֑ר וְ⁠לֹ֥א תִ֝שְׁתַּחֲוֶ֗ה לְ⁠אֵ֣ל נֵכָֽר׃ 10 11 אָנֹכִ֨י ׀ יְה֘וָ֤ה אֱלֹהֶ֗י⁠ךָ הַֽ֭⁠מַּעַלְ⁠ךָ מֵ⁠אֶ֣רֶץ מִצְרָ֑יִם הַרְחֶב־פִּ֝֗י⁠ךָ וַ⁠אֲמַלְאֵֽ⁠הוּ׃ 11 12 וְ⁠לֹא־שָׁמַ֣ע עַמִּ֣⁠י לְ⁠קוֹלִ֑⁠י וְ֝⁠יִשְׂרָאֵ֗ל לֹא־אָ֥בָה לִֽ⁠י׃ 12 13 וָֽ֭⁠אֲשַׁלְּחֵ⁠הוּ בִּ⁠שְׁרִיר֣וּת לִבָּ֑⁠ם יֵ֝לְכ֗וּ בְּֽ⁠מוֹעֲצוֹתֵי⁠הֶֽם׃ 13 14 ל֗וּ עַ֭מִּ⁠י שֹׁמֵ֣עַֽ לִ֑⁠י יִ֝שְׂרָאֵ֗ל בִּ⁠דְרָכַ֥⁠י יְהַלֵּֽכוּ׃ 14 15 כִּ֭⁠מְעַט אוֹיְבֵי⁠הֶ֣ם אַכְנִ֑יעַ וְ⁠עַ֥ל צָ֝רֵי⁠הֶ֗ם אָשִׁ֥יב יָדִֽ⁠י׃ 15 16 מְשַׂנְאֵ֣י יְ֭הוָה יְכַֽחֲשׁוּ־ל֑⁠וֹ וִ⁠יהִ֖י עִתָּ֣⁠ם לְ⁠עוֹלָֽם׃ 16 17 וַֽ֭⁠יַּאֲכִילֵ⁠הוּ מֵ⁠חֵ֣לֶב חִטָּ֑ה וּ֝⁠מִ⁠צּ֗וּר דְּבַ֣שׁ אַשְׂבִּיעֶֽ⁠ךָ׃