UHB PSA Chapter 64

◄ PSA 64 ► ║ ═ ©

64 1 לַ⁠מְנַצֵּ֗חַ מִזְמ֥וֹר לְ⁠דָוִֽד׃

1 2 שְׁמַע־אֱלֹהִ֣ים קוֹלִ֣⁠י בְ⁠שִׂיחִ֑⁠י מִ⁠פַּ֥חַד א֝וֹיֵ֗ב תִּצֹּ֥ר חַיָּֽ⁠י׃ 2 3 תַּ֭סְתִּירֵ⁠נִי מִ⁠סּ֣וֹד מְרֵעִ֑ים מֵ֝⁠רִגְשַׁ֗ת פֹּ֣עֲלֵי אָֽוֶן׃ 3 4 אֲשֶׁ֤ר שָׁנְנ֣וּ כַ⁠חֶ֣רֶב לְשׁוֹנָ֑⁠ם דָּרְכ֥וּ חִ֝צָּ֗⁠ם דָּבָ֥ר מָֽר׃ 4 5 לִ⁠יר֣וֹת בַּ⁠מִּסְתָּרִ֣ים תָּ֑ם פִּתְאֹ֥ם יֹ֝רֻ֗⁠הוּ וְ⁠לֹ֣א יִירָֽאוּ׃ 5 6 יְחַזְּקוּ־לָ֨⁠מוֹ ׀ דָּ֘בָ֤ר רָ֗ע יְֽ֭סַפְּרוּ לִ⁠טְמ֣וֹן מוֹקְשִׁ֑ים אָ֝מְר֗וּ מִ֣י יִרְאֶה־לָּֽ⁠מוֹ׃ 6 7 יַֽחְפְּֽשׂוּ־עוֹלֹ֗ת תַּ֭מְנוּ חֵ֣פֶשׂ מְחֻפָּ֑שׂ וְ⁠קֶ֥רֶב אִ֝֗ישׁ וְ⁠לֵ֣ב עָמֹֽק׃ 7 8 וַ⁠יֹּרֵ֗⁠ם אֱלֹ֫הִ֥ים חֵ֥ץ פִּתְא֑וֹם הָ֝י֗וּ מַכּוֹתָֽ⁠ם׃ 8 9 וַ⁠יַּכְשִׁיל֣וּ⁠הוּ עָלֵ֣י⁠מוֹ לְשׁוֹנָ֑⁠ם יִ֝תְנֹדֲד֗וּ כָּל־רֹ֥אֵה בָֽ⁠ם׃ 9 10 וַ⁠יִּֽירְא֗וּ כָּל־אָ֫דָ֥ם וַ֭⁠יַּגִּידוּ פֹּ֥עַל אֱלֹהִ֗ים וּֽ⁠מַעֲשֵׂ֥⁠הוּ הִשְׂכִּֽילוּ׃ 10 11 יִשְׂמַ֬ח צַדִּ֣יק בַּ֭⁠יהוָה וְ⁠חָ֣סָה ב֑⁠וֹ וְ֝⁠יִתְהַֽלְל֗וּ כָּל־יִשְׁרֵי־לֵֽב׃