UHB PSA Chapter 140

◄ PSA 140 ► ║ ═ ©

140 1 לַ⁠מְנַצֵּ֗חַ מִזְמ֥וֹר לְ⁠דָוִֽד׃

1 2 חַלְּצֵ֣⁠נִי יְ֭הוָה מֵ⁠אָדָ֣ם רָ֑ע מֵ⁠אִ֖ישׁ חֲמָסִ֣ים תִּנְצְרֵֽ⁠נִי׃ 2 3 אֲשֶׁ֤ר חָשְׁב֣וּ רָע֣וֹת בְּ⁠לֵ֑ב כָּל־י֝֗וֹם יָג֥וּרוּ מִלְחָמֽוֹת׃ 3 4 שָֽׁנֲנ֣וּ לְשׁוֹנָ⁠ם֮ כְּֽמוֹ־נָ֫חָ֥שׁ חֲמַ֥ת עַכְשׁ֑וּב תַּ֖חַת שְׂפָתֵ֣י⁠מוֹ סֶֽלָה׃ 4 5 שָׁמְרֵ֤⁠נִי יְהוָ֨ה ׀ מִ֘⁠ידֵ֤י רָשָׁ֗ע מֵ⁠אִ֣ישׁ חֲמָסִ֣ים תִּנְצְרֵ֑⁠נִי אֲשֶׁ֥ר חָ֝שְׁב֗וּ לִ⁠דְח֥וֹת פְּעָמָֽ⁠י׃ 5 6 טָֽמְנֽוּ־גֵאִ֨ים ׀ פַּ֡ח לִ֗⁠י וַ⁠חֲבָלִ֗ים פָּ֣רְשׂוּ רֶ֭שֶׁת לְ⁠יַד־מַעְגָּ֑ל מֹקְשִׁ֖ים שָֽׁתוּ־לִ֣⁠י סֶֽלָה׃ 6 7 אָמַ֣רְתִּי לַ֭⁠יהוָה אֵ֣לִ⁠י אָ֑תָּה הַאֲזִ֥ינָ⁠ה יְ֝הוָ֗ה ק֣וֹל תַּחֲנוּנָֽ⁠י׃ 7 8 יְהֹוִ֣ה אֲ֭דֹנָ⁠י עֹ֣ז יְשׁוּעָתִ֑⁠י סַכֹּ֥תָה לְ֝⁠רֹאשִׁ֗⁠י בְּ⁠י֣וֹם נָֽשֶׁק׃ 8 9 אַל־תִּתֵּ֣ן יְ֭הוָה מַאֲוַיֵּ֣י רָשָׁ֑ע זְמָמ֥⁠וֹ אַל־תָּ֝פֵ֗ק יָר֥וּמוּ סֶֽלָה׃ 9 10 רֹ֥אשׁ מְסִבָּ֑⁠י עֲמַ֖ל שְׂפָתֵ֣י⁠מוֹ יְכַסֵּֽמוֹ׃ [fn] 10 11 יִמּ֥וֹטוּ [fn] עֲלֵי⁠הֶ֗ם גֶּֽחָ֫לִ֥ים בָּ⁠אֵ֥שׁ יַפִּלֵ֑⁠ם בְּ֝⁠מַהֲמֹר֗וֹת בַּֽל־יָקֽוּמוּ׃ 11 12 אִ֥ישׁ לָשׁוֹן֮ בַּל־יִכּ֪וֹן בָּ֫⁠אָ֥רֶץ אִישׁ־חָמָ֥ס רָ֑ע יְ֝צוּדֶ֗⁠נּוּ לְ⁠מַדְחֵפֹֽת׃ 12 13 יָדַ֗עְתִּי [fn] כִּֽי־יַעֲשֶׂ֣ה יְ֭הוָה דִּ֣ין עָנִ֑י מִ֝שְׁפַּ֗ט אֶבְיֹנִֽים׃ 13 14 אַ֣ךְ צַ֭דִּיקִים יוֹד֣וּ לִ⁠שְׁמֶ֑⁠ךָ יֵשְׁב֥וּ יְ֝שָׁרִ֗ים אֶת־פָּנֶֽי⁠ךָ׃

K יכסו⁠מו

K ימיטו

K ידעת