Open Bible Data Home  About  News  OET Key

OETOET-RVOET-LVULTUSTBSBBLBAICNTOEBWEBWMBNETLSVFBVTCNTT4TLEBBBEMOFJPSASVDRAYLTDBYRVWBSKJBBBGNVCBTNTWYCSR-GNTUHBRelatedParallelInterlinearDictionarySearch

UHBBy Document By Chapter Details

LAMC1C2C3C4C5

UHB LAM Chapter 2

LAM 2 ©

2אֵיכָה֩ יָעִ֨יב בְּ⁠אַפּ֤⁠וֹ ׀ אֲדֹנָ⁠י֙ אֶת־בַּת־צִיּ֔וֹן הִשְׁלִ֤יךְ מִ⁠שָּׁמַ֨יִם֙ אֶ֔רֶץ תִּפְאֶ֖רֶת יִשְׂרָאֵ֑ל וְ⁠לֹא־זָכַ֥ר הֲדֹם־רַגְלָ֖י⁠ו בְּ⁠י֥וֹם אַפּֽ⁠וֹ׃ס 2בִּלַּ֨ע אֲדֹנָ֜⁠י לא[fn] חָמַ֗ל אֵ֚ת כָּל־נְא֣וֹת יַעֲקֹ֔ב הָרַ֧ס בְּ⁠עֶבְרָת֛⁠וֹ מִבְצְרֵ֥י בַת־יְהוּדָ֖ה הִגִּ֣יעַ לָ⁠אָ֑רֶץ חִלֵּ֥ל מַמְלָכָ֖ה וְ⁠שָׂרֶֽי⁠הָ׃ס 3גָּדַ֣ע בָּֽ⁠חֳרִי אַ֗ף כֹּ֚ל קֶ֣רֶן יִשְׂרָאֵ֔ל הֵשִׁ֥יב אָח֛וֹר יְמִינ֖⁠וֹ מִ⁠פְּנֵ֣י אוֹיֵ֑ב וַ⁠יִּבְעַ֤ר בְּ⁠יַעֲקֹב֙ כְּ⁠אֵ֣שׁ לֶֽהָבָ֔ה אָכְלָ֖ה סָבִֽיב׃ס 4דָּרַ֨ךְ קַשְׁתּ֜⁠וֹ כְּ⁠אוֹיֵ֗ב נִצָּ֤ב יְמִינ⁠וֹ֙ כְּ⁠צָ֔ר וַֽ⁠יַּהֲרֹ֔ג כֹּ֖ל מַחֲמַדֵּי־עָ֑יִן בְּ⁠אֹ֨הֶל֙ בַּת־צִיּ֔וֹן שָׁפַ֥ךְ כָּ⁠אֵ֖שׁ חֲמָתֽ⁠וֹ׃ס 5הָיָ֨ה אֲדֹנָ֤⁠י ׀ כְּ⁠אוֹיֵב֙ בִּלַּ֣ע יִשְׂרָאֵ֔ל בִּלַּע֙ כָּל־אַרְמְנוֹתֶ֔י⁠הָ שִׁחֵ֖ת מִבְצָרָ֑י⁠ו וַ⁠יֶּ֨רֶב֙ בְּ⁠בַת־יְהוּדָ֔ה תַּאֲנִיָּ֖ה וַ⁠אֲנִיָּֽה׃ס 6וַ⁠יַּחְמֹ֤ס כַּ⁠גַּן֙ שֻׂכּ֔⁠וֹ שִׁחֵ֖ת מוֹעֲד֑⁠וֹ שִׁכַּ֨ח יְהוָ֤ה ׀ בְּ⁠צִיּוֹן֙ מוֹעֵ֣ד וְ⁠שַׁבָּ֔ת וַ⁠יִּנְאַ֥ץ בְּ⁠זַֽעַם־אַפּ֖⁠וֹ מֶ֥לֶךְ וְ⁠כֹהֵֽן׃ס 7זָנַ֨ח אֲדֹנָ֤⁠י ׀ מִזְבְּח⁠וֹ֙ נִאֵ֣ר מִקְדָּשׁ֔⁠וֹ הִסְגִּיר֙ בְּ⁠יַד־אוֹיֵ֔ב חוֹמֹ֖ת אַרְמְנוֹתֶ֑י⁠הָ ק֛וֹל נָתְנ֥וּ בְּ⁠בֵית־יְהוָ֖ה כְּ⁠י֥וֹם מוֹעֵֽד׃ס 8חָשַׁ֨ב יְהוָ֤ה ׀ לְ⁠הַשְׁחִית֙ חוֹמַ֣ת בַּת־צִיּ֔וֹן נָ֣טָה קָ֔ו לֹא־הֵשִׁ֥יב יָד֖⁠וֹ מִ⁠בַּלֵּ֑עַ וַ⁠יַּֽאֲבֶל־חֵ֥ל וְ⁠חוֹמָ֖ה יַחְדָּ֥ו אֻמְלָֽלוּ׃ס 9טָבְע֤וּ בָ⁠אָ֨רֶץ֙ שְׁעָרֶ֔י⁠הָ אִבַּ֥ד וְ⁠שִׁבַּ֖ר בְּרִיחֶ֑י⁠הָ מַלְכָּ֨⁠הּ וְ⁠שָׂרֶ֤י⁠הָ בַ⁠גּוֹיִם֙ אֵ֣ין תּוֹרָ֔ה גַּם־נְבִיאֶ֕י⁠הָ לֹא־מָצְא֥וּ חָז֖וֹן מֵ⁠יְהוָֽה׃ס 10יֵשְׁב֨וּ לָ⁠אָ֤רֶץ יִדְּמוּ֙ זִקְנֵ֣י בַת־צִיּ֔וֹן הֶֽעֱל֤וּ עָפָר֙ עַל־רֹאשָׁ֔⁠ם חָגְר֖וּ שַׂקִּ֑ים הוֹרִ֤ידוּ לָ⁠אָ֨רֶץ֙ רֹאשָׁ֔⁠ן בְּתוּלֹ֖ת יְרוּשָׁלִָֽם׃ס 11כָּל֨וּ בַ⁠דְּמָע֤וֹת עֵינַ⁠י֙ חֳמַרְמְר֣וּ מֵעַ֔⁠י נִשְׁפַּ֤ךְ לָ⁠אָ֨רֶץ֙ כְּבֵדִ֔⁠י עַל־שֶׁ֖בֶר בַּת־עַמִּ֑⁠י בֵּֽ⁠עָטֵ֤ף עוֹלֵל֙ וְ⁠יוֹנֵ֔ק בִּ⁠רְחֹב֖וֹת קִרְיָֽה׃ס 12לְ⁠אִמֹּתָ⁠ם֙ יֹֽאמְר֔וּ אַיֵּ֖ה דָּגָ֣ן וָ⁠יָ֑יִן בְּ⁠הִֽתְעַטְּפָ֤⁠ם כֶּֽ⁠חָלָל֙ בִּ⁠רְחֹב֣וֹת עִ֔יר בְּ⁠הִשְׁתַּפֵּ֣ךְ נַפְשָׁ֔⁠ם אֶל־חֵ֖יק אִמֹּתָֽ⁠ם׃ס 13מָֽה־אֲעִידֵ֞⁠ךְ מָ֣ה אֲדַמֶּה־לָּ֗⁠ךְ הַ⁠בַּת֙ יְר֣וּשָׁלִַ֔ם מָ֤ה אַשְׁוֶה־לָּ⁠ךְ֙ וַ⁠אֲנַֽחֲמֵ֔⁠ךְ בְּתוּלַ֖ת בַּת־צִיּ֑וֹן כִּֽי־גָד֥וֹל כַּ⁠יָּ֛ם שִׁבְרֵ֖⁠ךְ מִ֥י יִרְפָּא־לָֽ⁠ךְ׃ס 14נְבִיאַ֗יִ⁠ךְ חָ֤זוּ לָ⁠ךְ֙ שָׁ֣וְא וְ⁠תָפֵ֔ל וְ⁠לֹֽא־גִלּ֥וּ עַל־עֲוֺנֵ֖⁠ךְ לְ⁠הָשִׁ֣יב שְׁבוּתֵ֑ךְ[fn] וַ⁠יֶּ֣חֱזוּ לָ֔⁠ךְ מַשְׂא֥וֹת שָׁ֖וְא וּ⁠מַדּוּחִֽים׃ס 15סָֽפְק֨וּ עָלַ֤יִ⁠ךְ כַּפַּ֨יִם֙ כָּל־עֹ֣בְרֵי דֶ֔רֶךְ שָֽׁרְקוּ֙ וַ⁠יָּנִ֣עוּ רֹאשָׁ֔⁠ם עַל־בַּ֖ת יְרוּשָׁלִָ֑ם הֲ⁠זֹ֣את הָ⁠עִ֗יר שֶׁ⁠יֹּֽאמְרוּ֙ כְּלִ֣ילַת יֹ֔פִי מָשׂ֖וֹשׂ לְ⁠כָל־הָ⁠אָֽרֶץ׃ס 16פָּצ֨וּ עָלַ֤יִ⁠ךְ פִּי⁠הֶם֙ כָּל־א֣וֹיְבַ֔יִ⁠ךְ שָֽׁרְקוּ֙ וַ⁠יַּֽחַרְקוּ־שֵׁ֔ן אָמְר֖וּ בִּלָּ֑עְנוּ אַ֣ךְ זֶ֥ה הַ⁠יּ֛וֹם שֶׁ⁠קִּוִּינֻ֖⁠הוּ מָצָ֥אנוּ רָאִֽינוּ׃ס 17עָשָׂ֨ה יְהוָ֜ה אֲשֶׁ֣ר זָמָ֗ם בִּצַּ֤ע אֶמְרָת⁠וֹ֙ אֲשֶׁ֣ר צִוָּ֣ה מִֽ⁠ימֵי־קֶ֔דֶם הָרַ֖ס וְ⁠לֹ֣א חָמָ֑ל וַ⁠יְשַׂמַּ֤ח עָלַ֨יִ⁠ךְ֙ אוֹיֵ֔ב הֵרִ֖ים קֶ֥רֶן צָרָֽיִ⁠ךְ׃ס 18צָעַ֥ק לִבָּ֖⁠ם אֶל־אֲדֹנָ֑⁠י חוֹמַ֣ת בַּת־צִ֠יּוֹן הוֹרִ֨ידִי כַ⁠נַּ֤חַל דִּמְעָה֙ יוֹמָ֣ם וָ⁠לַ֔יְלָה אַֽל־תִּתְּנִ֤י פוּגַת֙ לָ֔⁠ךְ אַל־תִּדֹּ֖ם בַּת־עֵינֵֽ⁠ךְ׃ס 19ק֣וּמִי ׀ רֹ֣נִּי בַלַּ֗יְלָה[fn] לְ⁠רֹאשׁ֙ אַשְׁמֻר֔וֹת שִׁפְכִ֤י כַ⁠מַּ֨יִם֙ לִבֵּ֔⁠ךְ נֹ֖כַח פְּנֵ֣י אֲדֹנָ֑⁠י שְׂאִ֧י אֵלָ֣י⁠ו כַּפַּ֗יִ⁠ךְ עַל־נֶ֨פֶשׁ֙ עֽוֹלָלַ֔יִ⁠ךְ הָ⁠עֲטוּפִ֥ים בְּ⁠רָעָ֖ב בְּ⁠רֹ֥אשׁ כָּל־חוּצֽוֹת׃ס 20רְאֵ֤ה יְהוָה֙ וְֽ⁠הַבִּ֔יטָ⁠ה לְ⁠מִ֖י עוֹלַ֣לְתָּ כֹּ֑ה אִם־תֹּאכַ֨לְנָה נָשִׁ֤ים פִּרְיָ⁠ם֙ עֹלֲלֵ֣י טִפֻּחִ֔ים אִם־יֵהָרֵ֛ג בְּ⁠מִקְדַּ֥שׁ אֲדֹנָ֖⁠י כֹּהֵ֥ן וְ⁠נָבִֽיא׃ס 21שָׁכְב֨וּ לָ⁠אָ֤רֶץ חוּצוֹת֙ נַ֣עַר וְ⁠זָקֵ֔ן בְּתוּלֹתַ֥⁠י וּ⁠בַחוּרַ֖⁠י נָפְל֣וּ בֶ⁠חָ֑רֶב הָרַ֨גְתָּ֙ בְּ⁠י֣וֹם אַפֶּ֔⁠ךָ טָבַ֖חְתָּ לֹ֥א חָמָֽלְתָּ׃ס 22תִּקְרָא֩ כְ⁠י֨וֹם מוֹעֵ֤ד מְגוּרַ⁠י֙ מִ⁠סָּבִ֔יב וְ⁠לֹ֥א הָיָ֛ה בְּ⁠י֥וֹם אַף־יְהוָ֖ה פָּלִ֣יט וְ⁠שָׂרִ֑יד אֲשֶׁר־טִפַּ֥חְתִּי וְ⁠רִבִּ֖יתִי אֹיְבִ֥⁠י כִלָּֽ⁠ם׃פ


Q וְלֹ֣א

K שבית⁠ך

K ב⁠ליל

LAM 2 ©

LAMC1C2C3C4C5